საქართველოს საპატრიარქო საქართველოს მართლმადიდებელი ეკლესიის სინოდალური კომისიის დასკვნას აქვეყნებს.
საპატრიარქოს ცნობით, კომისიამ განიხილა რამდენიმე საკითხი, მათ შორის შუამდგომლობით მიმართა პატრიარქს მცხეთა-თბილისის ეპარქიის მღვდელმსახურ, დეკანოზ პეტრე კვარაცხელიასთვის კომისიის მომავალ სხდომამდე ყოველგვარი მღვდელმოქმედების შეჩერების შესახებ.
საპატრიარქოს მიერ გავრცელებული სინოდალური კომისიის დასკვნის მიხედვით, დეკანოზი პეტრე კვარაცხელია მღვდლისთვის შეუფერებელი ქმედებების გამო სამგზის იყო დაბარებული კომისიაზე, მაგრამ არ გამოცხადდა და კომისიამ არასაპატიოდ სცნო მისი არგუმენტები.
„ა.წ. 13 თებერვალს საქართველოს საპატრიარქოში გაიმართა საქართველოს ეკლესიის სინოდალური კომისიის სხდომა.
სხდომას ესწრებოდნენ: საქართველოს საპატრიარქო ტახტის მოსაყდრე, სენაკისა და ჩხოროწყუს მიტროპოლიტი შიო (მუჯირი) – კომისიის თავმჯდომარე; სრულიად საქართველოს კათოლიკოს-პატრიარქის ქორეპისკოპოსი, ახალციხისა და ტაო-კლარჯეთის მიტროპოლიტი თეოდორე (ჭუაძე); გორისა და ატენის მიტროპოლიტი ანდრია (გვაზავა); დეკანოზი მიქაელ ბოტკოველი (სრულიად საქართველოს კათოლიკოს-პატრიარქის მდივანი).
კომისისამ განიხილა რამდენიმე საკითხი. კერძოდ: პირველი – ტყიბულისა და თერჯოლის ეპარქიის მღვდელმსახურის, დეკანოზ სპირიდონ ცქიფურიშვილის; მეორე – სოფელ დიღმის წმ. მარინეს სახელობის ტაძრის სამრევლოს წევრის, ლევან (ანასტასი) ზუმბაძის და მესამე – მცხეთა-თბილისის ეპარქიის მღვდელმსახურის, დეკანოზ პეტრე კვარაცხელიასი.
ტყიბულისა და თერჯოლის ეპარქიის მღვდელმსახურმა, დეკანოზმა სპირიდონ ცქიფურიშვილმა კომისიის წევრების წინაშე ითხოვა შენდობა მასმედიის საშუალებით სასულიერო პირების მისამართით გაკეთებული შეურაცხმყოფელი განცხადებების გამო. მისი სინანულის საფუძველზე, კომისიამ შუამდგომლობით მიმართა ტყიბულისა და თერჯოლის ეპარქიის მიტროპოლიტ გიორგის (შალამბერიძე), რომ დეკანოზ სპირიდონ ცქიფურიშვილს სრულად აღუდგეს მღვდელმოქმედების უფლება.
კომისიის წევრების წინაშე შენდობა ითხოვა, ასევე, სოფელ დიღმის წმ. მარინეს სახელობის ტაძრის სამრევლოს წევრმა, ლევან (ანასტასი) ზუმბაძემ დეკანოზ ანდრია ჯაღმაიძის მისამართით სოციალურ ქსელში მის მიერ გავრცელებული შეურაცხმყოფელი და ცილისმწამებლური განცხადებების გამო. კომისიამ მისცა გაფრთხილება, რომ მსგავსი ქმედებების განმეორების შემთხვევაში მას შეუჩერდება ზიარების უფლება.
მცხეთა-თბილისის ეპარქიის მღვდელმსახური, დეკანოზი პეტრე კვარაცხელია მღვდლისთვის შეუფერებელი ქმედებებისა და გამონათქვამების გამო სამგზის იყო დაბარებული კომისიაზე, მაგრამ არ გამოცხადდა არასაპატიო მიზეზით – უცხოეთში ყოფნის გამო, რაზეც მას, გაფრთხილების მიუხედავად, კურთხევა არ ჰქონდა აღებული. კომისიამ არასაპატიოდ სცნო მისი არგუმენტები და შუამდგომლობით მიმართა სრულიად საქართველოს კათოლიკოს-პატრიარქს, უწმინდესსა და უნეტარეს ილია II-ს, დეკანოზ პეტრე კვარაცხელიასთვის კომისიის მომავალ სხდომამდე ყოველგვარი მღვდელმოქმედების შეჩერების შესახებ“, – ნათქვამია სინოდალური კომისიის დასკვნაში.
