აშშ-ის კოლუმბიის ოლქის სასამართლომ საქართველოს წინააღმდეგ ENKA Renewables-ის სასარგებლოდ გამოტანილი საერთაშორისო საარბიტრაჟო გადაწყვეტილება აღსრულებაში მოაქცია. 11 სექტემბრით დათარიღებული გადაწყვეტილება „ნამახვანჰესის“ პროექტთან დაკავშირებულ დავას ეხება.
საერთაშორისო სავაჭრო პალატის (ICC) საარბიტრაჟო ტრიბუნალმა საქართველოს ჯერ კიდევ 2024 წლის დეკემბერში ENKA-სთვის დაახლოებით 383 მილიონი დოლარის კომპენსაციის გადახდა დააკისრა. თანხას ერიცხება SOFR+4%-იანი პროცენტი, რის გამოც, BM.GE-ის ინფორმაციით, გადასახდელი თანხა ამ დროისთვის 400 მილიონ დოლარს მნიშვნელოვნად აღემატება.
საქართველო საარბიტრაჟო გადაწყვეტილების გაუქმებას საფრანგეთის სასამართლოში ცდილობს და აშშ-ის სასამართლოსაც სთხოვდა, პარიზში მიმდინარე პროცესის დასრულებამდე აღსრულება შეეჩერებინა. კოლუმბიის ოლქის სასამართლომ ეს მოთხოვნა არ დააკმაყოფილა და ENKA-ს მოთხოვნა საარბიტრაჟო გადაწყვეტილების აღსრულების შესახებ დააკმაყოფილა.
სასამართლომ არ გაიზიარა საქართველოს არგუმენტებიც, რომ საარბიტრაჟო განხილვისას სახელმწიფოს ზიანის დათვლასთან დაკავშირებით საკუთარი პოზიციის სრულყოფილად წარმოდგენის შესაძლებლობა არ მიეცა და რომ გადაწყვეტილების აღსრულება აშშ-ის საჯარო პოლიტიკას ეწინააღმდეგებოდა.
დავა „ნამახვანჰესის“ პროექტს უკავშირდება. ENKA 433-მეგავატიანი ჰიდროელექტროსადგურების კასკადის მშენებლობას გეგმავდა, რომლის საინვესტიციო ღირებულება დაახლოებით 800 მილიონი დოლარი იყო. კომპანიამ პროექტის მოსამზადებელ სამუშაოებში, მისი მონაცემებით, დაახლოებით 100 მილიონი დოლარი უკვე დახარჯა.
2021 წელს პროექტი შეჩერდა და ENKA-მ სახელმწიფოსთან საინვესტიციო შეთანხმება შეწყვიტა, რის შემდეგაც საერთაშორისო არბიტრაჟს მიმართა. საარბიტრაჟო ტრიბუნალმა საბოლოოდ საქართველოს კომპენსაციის გადახდა დააკისრა.
