გოჩა მირცხულავა: ნაციონალური მოძრაობის მანიფესტის მთავარი გზავნილია - „საქართველოს მოქალაქისა და სახელმწიფოსთვის“

ენმ წინა წლებისგან განსხვავებულ პოლიტიკურ სტრატეგიას ირჩევს, რომელიც საქმეს და კონკრეტიკას დაეფუძნება, ასე აფასებს ერთიანი ნაციონალური მოძრაობის მიერ გამოქვეყნებულ მანიფესტს ანალიტიკოსი გოჩა მირცხულავა.

მირცხულავა მიიჩნევს, რომ ენმ-ს მანიფესტი საკმაოდ კარგი პოლიტიკური დოკუმენტია, რომლის განხილვა და რომელზე მსჯელობაც "იმ 9 წლის" პრიზმაში, ნიშნავს პოლიტიკურ უმეცრებას.

„ენმ-ს მანიფესტი საკმაოდ კარგი პოლიტიკური დოკუმენტია, რომლის განხილვა და რომელზე მსჯელობაც "იმ 9 წლის" პრიზმაში, ნიშნავს პოლიტიკურ უმეცრებას.

"იმ 9 წლის" გამო პარტიამ თუ მისმა ლიდერებმა პასუხი აგეს, როგორც პოლიტიკურად ასევე ინდივიდუალურადაც. ამიტომ, მუდმივი აპელაცია "იმ 9 წელზე", მომავლის მანიფესტის პრიზმაში თავად ენმ-ს ვერაფერს დააკლებს და იმათ, ვინც რეალობას თვალს ვერ გაუსწორებს, ბევრს“, - აცხადებს ანალიტიკსი.

მისვე თქმით,  ცხადია, რომ ენმ არჩევნებისთვის სულ სხვაგვარად ემზადება და დროთა განმავლობაში მანიფესტს მოჰყვება კონკრეტული ქმედებები და დოკუმენტებიც.

„უკვე ცხადია, რომ ენმ არჩევნებისთვის სულ სხვაგვარად ემზადება და დროთა განმავლობაში მანიფესტს მოჰყვება კონკრეტული ქმედებები და დოკუმენტებიც. ისიც ცხადია, რომ პარტია წინა წლებისგან განსხვავებულ პოლიტიკურ სტრატეგიას ირჩევს, რომელიც საქმეს და კონკრეტიკას დაეფუძნება. ეს კი ნამდვილად პრობლემა იქნება მისი ოპონენტებისთვის, რადგან ისინი ენმ-სგან რადიკალიზაციას და ამის საფუძველზე მის მიერ შემოთავაზებული წინადადებებისა თუ ხედვების მარგინალიზაციას არიან მიჩვეული.

ამ მოდელით იხელმძღვანელა პარტიამ გასული საპარლამენტო და თვითმმართველობის არჩევნების დროს ერთ-ერთ რეგიონში და მიუხედავად ხელის შეშლისა და არ მომერიდება - ობსტრუქციისა, გუნდის შიგნიდან, შედეგები იყო შთამბეჭდავი“, - აცხადებს მირცხულავა.

იგი განმარტავს თუ რა არის მანიფესტის მთავარი გზავნილი.

„მარტივად, რას ამბობს მანიფესტი? "საქართველოსა და საქართველოს მოქალაქისთვის!" ანუ საქართველოს სახელმწიფოსთვის.

საკმაოდ მაღალი პოლიტიკური თამასაა და საინტერესოც. ვნახოთ, რამდენად შეძლებს პარტია, ამ იდეის გაშლას და ხალხამდე მიტანას, უკვე კონკრეტული გზავნილებითა და ხალხის, მოსახლეობის, საქართველოს მოქალაქეებისა და სახელმწიფოს წინაშე არსებული გამოწვევების გათვალისწინებით“, აღნიშნავს ანალიტიკოსი.

შეგახსენებთ, რომ ენმ-მ 11 პუნქტიანი მანიფესტი გამოაქვეყნა.