ზელენსკის თქმით, თურქეთს შეუძლია მნიშვნელოვანი შუამავლის როლი შეასრულოს, რადგან პრეზიდენტ რეჯეფ თაიფ ერდოღანს ურთიერთობა აქვს როგორც აშშ-ის პრეზიდენტ დონალდ ტრამპთან, ისე ვლადიმირ პუტინთან.
„ეს ომი უნდა დასრულდეს. ჩვენ უნდა გავერთიანდეთ, რათა ომი ცხელი ფაზიდან, სულ მცირე, დიპლომატიურ ფაზაში გადავიტანოთ. იმედი მაქვს თურქეთის შუამავლობის. დღეს კვლავ განვიხილეთ თურქეთში ლიდერების დონეზე სამმხრივი შეხვედრის ჩატარების შესაძლებლობა. თუ თურქეთი ამის ორგანიზებას შეძლებს, სიამოვნებით დავთანხმდებით“, – განაცხადა ზელენსკიმ.
უკრაინის პრეზიდენტის ინფორმაციით, აშშ-ს აქვს წინადადება აბუ-დაბიში უკრაინის, რუსეთისა და ამერიკის ტექნიკური ჯგუფების სამმხრივი შეხვედრის გამართვის შესახებ. მოლაპარაკებების დღის წესრიგში ენერგეტიკული და საზღვაო ზავი, ტყვეების გაცვლა და ლიდერთა სამიტისთვის მომზადება იქნება.
ზელენსკიმ აღნიშნა, რომ ტექნიკური მოლაპარაკებების პარალელურად აუცილებელია უმაღლესი დონის შეხვედრაც, რადგან რიგი საკითხების გადაწყვეტა მხოლოდ სახელმწიფო ლიდერებს შეუძლიათ.
მისი განცხადებით, უკრაინის პრიორიტეტია არსებული ფრონტის ხაზზე სრული და უპირობო ცეცხლის შეწყვეტა, მისი შესრულების მონიტორინგის ეფექტიანი მექანიზმის შექმნა და უსაფრთხოების გარანტიების მიღება. ლიდერთა შეხვედრაზე ასევე უნდა განიხილონ უკრაინის აღდგენისა და ტერიტორიული საკითხები.
ამასთან, ზელენსკიმ ხაზგასმით განაცხადა, რომ უკრაინა საკუთარი ტერიტორიების რუსეთის კუთვნილებად აღიარებას არ აპირებს.
„ჩვენ არ დავთმობთ ჩვენს ტერიტორიებს. ვერ შევეგუებით მოსაზრებას, რომ ჩვენი აღმოსავლეთი ტერიტორიები, მათ შორის რუსეთის დროებითი ოკუპაციის ქვეშ მყოფი ყირიმი, რუსეთს ეკუთვნის. ეს ეწინააღმდეგება ჩვენს ღირსებას, საზოგადოების ნებასა და კონსტიტუციას. ჩვენი პრიორიტეტია ცეცხლის შეწყვეტა არსებულ ფრონტის ხაზზე, რის შემდეგაც შესაძლებელი იქნება სხვა საკითხების განხილვა“, – აღნიშნა უკრაინის პრეზიდენტმა.
კითხვაზე, მზად არის თუ არა პირადად შეხვდეს პუტინს თურქეთში, ზელენსკიმ დადებითად უპასუხა და განაცხადა, რომ ანკარას შეუძლია პრაქტიკული და რეალისტური შუამავლის ფუნქციის შესრულება.
„დიახ, მზად ვართ ამ შეხვედრისთვის თურქეთში. თურქეთს შეუძლია სრულფასოვანი შუამავლის როლი შეასრულოს. შეხვედრისას ის არცერთ მხარეს არ დაიჭერს. ამასთან, თურქეთი მხარს უჭერს უკრაინის სუვერენიტეტსა და ტერიტორიულ მთლიანობას“, – განაცხადა ზელენსკიმ.
