უკრაინა რუსულ ნავთობგადამამუშავებელ ქარხნებზე დარტყმებს გააძლიერებს მოსკოვის მიერ არჩეული საჰაერო თავდასხმების ახალი სტრატეგიის საპასუხოდ, ამის შესახებ უკრაინის პრეზიდენტმა ვოლოდიმირ ზელენსკიმ Reuters-თან ინტერვიუში განაცხადა.
ზელენსკის თქმით, უკრაინის სადაზვერვო სამსახურებმა მოიპოვეს დოკუმენტები, რომლებიც, მისი მტკიცებით, ადასტურებს, რომ რუსეთის პრეზიდენტმა ვლადიმერ პუტინმა ზამთრის წინ „ახალი დოქტრინის“ ამოქმედების ბრძანება გასცა. უკრაინის პრეზიდენტის განცხადებით, აღნიშნული სტრატეგია სამოქალაქო დანიშნულების ობიექტების გაცილებით ფართო სპექტრზე დარტყმებს ითვალისწინებს და მისი მიზანი მოსახლეობაზე ზეწოლაა.
„ვიხილეთ დოკუმენტები და ვიცით, რომ ისინი ითვალისწინებს ინფრასტრუქტურისა და ლოგისტიკის წინააღმდეგ თავდასხმებს, განსაკუთრებით კი ქალაქებსა და სოფლებში, ყველგან: გზებზე, სკოლებსა და საავადმყოფოებზე დარტყმებს. ხალხზე ზეწოლის მოხდენა, რათა მათ დატოვონ დედაქალაქი და სხვა ქალაქები, სწორედ ეს არის ამ ოპერაციის მიზანი“, – განაცხადა ზელენსკიმ.
მისი შეფასებით, რუსეთის ტაქტიკის ცვლილება უკავშირდება პუტინის სურვილს, ძლიერად წარმოაჩინოს თავი იმ ფონზე, როდესაც, ზელენსკის თქმით, რუსეთის არმია დონბასში პოზიციებს კარგავს და მნიშვნელოვან დანაკარგებს განიცდის.
უკრაინის პრეზიდენტმა აღნიშნა, რომ კიევი რუსეთის ახალ ტაქტიკას საპასუხო დარტყმებით უპასუხებს, თუმცა სამოქალაქო ობიექტებს სამიზნედ არ აქცევს.
„ნებისმიერი გზით უნდა ვუპასუხოთ. მათი მხრიდან ჩვენს ენერგეტიკულ ინფრასტრუქტურაზე თავდასხმებს, ჩვენც მათ ენერგეტიკულ ობიექტებზე დარტყმით უნდა ვუპასუხოთ. უპირველეს ყოვლისა, ნავთობგადამამუშავებელ ქარხნებს და ა.შ., იმას, რაც მათ ამ ომისთვის ფინანსურ რესურსს აძლევს. თუმცა, რა თქმა უნდა, ჩვენ არ ვუპასუხებთ ისე, როგორც ისინი იქცევიან, სამოქალაქო ობიექტებზე თავდასხმით“, – განაცხადა ვოლოდიმირ ზელენსკიმ.
