რუსეთთან მოლაპარაკებებისას შეერთებულ შტატებს არ უნდა ავიწყდებოდეს, რომ ის რუსეთზე ასჯერ ძლიერია, ამის შესახებ უკრაინის პრეზიდენტმა ვოლოდიმირ ზელენსკიმ Reuters-თან ინტერვიუში განაცხადა.
ზელენსკის თქმით, მას სჯერა, რომ შეერთებულ შტატებს ომის დასრულება ნამდვილად სურს, თუმცა რუსეთისთვის კომპრომისების შეთავაზებაზე დროის დახარჯვას არასწორ მიდგომად მიიჩნევს.
„ვენდობი მათ. ამავდროულად მესმის, რომ რთულია ისეთი დიდი ვინმეს გაჩერება, ვისაც გაჩერება არ სურს. ამიტომ თქვენ [აშშ] ცდილობთ რუსეთთან გარკვეული კომპრომისების პოვნას. მაგრამ მე ვფიქრობ, რომ ტყუილად დავხარჯავთ დროს, თუ რუსულ კომპრომისებს ავყვებით“, – განაცხადა ზელენსკიმ.
უკრაინის პრეზიდენტის თქმით, დონალდ ტრამპს ახლა „სურს გარკვეული გამარჯვების მოპოვება შუალედურ არჩევნებამდე“.
ამასთან, ზელენსკი მიიჩნევს, რომ რუსეთის პრეზიდენტი ვლადიმერ პუტინი შეეცდება ირანზე ზეწოლას და ვითარების იმგვარად განვითარებას, რომ მოლაპარაკებების გაგრძელება შეუძლებელი გახდეს.
„იგივეა უკრაინის წინააღმდეგ რუსეთის ომშიც. თუ პუტინი დაინახავს, რომ პრეზიდენტ ტრამპს გარკვეული გამარჯვება სჭირდება, ის გადაწყვეტს, რა მისცეს და რა არა. და პრობლემაც ამაში მდგომარეობს: პუტინი ფიქრობს, რომ სწორედ მას შეუძლია გადაწყვეტილებების მიღება. მაგრამ ამერიკა რუსეთზე ასჯერ ძლიერია. მათ უბრალოდ არ უნდა ავიწყდებოდეთ ეს“, – განაცხადა ვოლოდიმირ ზელენსკიმ.
