2027 წლის სახელმწიფო ბიუჯეტის პროექტის პირველადი ვარიანტის მიხედვით, სახელმწიფო ბიუჯეტის ასიგნებების მოცულობა 32 071,5 მლნ ლარს შეადგენს, რაც 2026 წლის დამტკიცებულ გეგმასთან შედარებით 1 190,1 მლნ ლარით მეტია.
დოკუმენტის მიხედვით, მომავალ წელს რამდენიმე სამინისტროს დაფინანსება იზრდება. ყველაზე დიდი ზრდა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს აქვს. უწყების ასიგნებები 2026 წლის გეგმასთან შედარებით 811,2 მლნ ლარით იზრდება და 10 479,8 მლნ ლარს შეადგენს.
განათლების, მეცნიერებისა და ახალგაზრდობის სამინისტროს დაფინანსება 225,8 მლნ ლარით გაიზრდება და 2 928,0 მლნ ლარს მიაღწევს. კულტურის სამინისტროსთვის 370,0 მლნ ლარია გათვალისწინებული, ხოლო სპორტის სამინისტროსთვის – 382,0 მლნ ლარი.
რეგიონული განვითარებისა და ინფრასტრუქტურის სამინისტროს დაფინანსებისთვის 3 296,9 მლნ ლარია გათვალისწინებული. გარემოს დაცვისა და სოფლის მეურნეობის სამინისტროს დაფინანსება 1 015,0 მლნ ლარს შეადგენს, ეკონომიკისა და მდგრადი განვითარების სამინისტროსთვის კი 1 457,0 მლნ ლარია გამოყოფილი.
2027 წლის ბიუჯეტის პროექტის მიხედვით, ფინანსთა სამინისტროს დაფინანსება 145,0 მლნ ლარს შეადგენს, იუსტიციის სამინისტროსთვის 490,4 მლნ ლარია გათვალისწინებული, საგარეო საქმეთა სამინისტროსთვის – 232,8 მლნ ლარი, ხოლო თავდაცვის სამინისტროსთვის – 1 965,0 მლნ ლარი.
შინაგან საქმეთა სამინისტროს დაფინანსება მომავალ წელს 1 680,0 მლნ ლარი იქნება. პროექტის მიხედვით, აღნიშნულ თანხაში პოლიციელთა ხელფასების ზრდაც არის გათვალისწინებული.
