უკრაინის პრეზიდენტი ვოლოდიმირ ზელენსკი დანიის დედაქალაქ კოპენჰაგენში მიმდინარე ნატო-ს საპარლამენტო ასამბლეის 69-ე სესიაზე გამოსვლისას ისრაელში არსებულ ვითარებას გამოეხმაურა.
„ამ დღეების განმავლობაში ჩვენი ყურადღება შუა აღმოსავლეთისკენაა მიმართული, ვერავინ ვერასდროს დაივიწყებს, რა ქნეს ტერორისტებმა ისრაელში. ათასობით რაკეტა მშვიდობიანი ქალაქების წინააღმდეგ; ხალხს მანქანებში ესვრიან; ქუჩები სისხლითაა დაფარული“, – აღნიშნა ზელენსკიმ.
ამასთან, უკრაინის პრეზიდენტმა ისრაელსა და უკრაინაში არსებულ ვითარებას შორის პარალელი გაავლო და აღნიშნა, რომ ორივე ქვეყანაზე თავდასხმას ტერორისტები ახორციელებენ.
„ისრაელელებმა, ისრაელელმა იორდანელებმა, რომლებიც იყვნენ უკრაინაში, იყვნენ ბუჩაში, ნახეს იგივე ბოროტება, რაც რუსეთმა დაატრიალა. ერთადერთი განსხვავება ისაა, რომ ისრაელზე თავდამსხმელი ტერორისტული ორგანიზაციაა, ხოლო უკრაინაზე თავდამსხმელი – ტერორისტული სახელმწიფო. არსი იგივეა. თქვენ ხედავთ სისხლს ქუჩებში, იმავე სამოქალაქო მანქანებისთვის სროლას, ადამიანების ცხედრებს“, – განაცხადა უკრაინის პრეზიდენტმა.
ვოლოდიმირ ზელენსკიმ ისრაელში განვითარებულ მოვლენებთან დაკავშირებით ირანის პასუხისმგებლობის საკითხზეც გაამახვილა ყურადღება.
„ირანს არ შეუძლია, თქვას, რომ არაფრის გაკეთება შეუძლია იმასთან დაკავშირებით, რაც ისრაელში ხდება. სადამდე შეიძლება, ეს ბოროტება მივიდეს?“ – აღნიშნა ზელენსკიმ.
