ბრალდებული ძმების, დავით და გიორგი ფეიქრიშვილების დედა, ნინო აბრამიშვილი აცხადებს, რომ გამოძიების ფარგლებში ამოღებული და დალუქული მობილური ტელეფონები იმ პირების ხელში აღმოჩნდა, რომლებიც, მისი თქმით, მის შვილზე ზეწოლას ახდენდნენ. აბრამიშვილი პროკურატურისა და პოლიციისგან განმარტებას ითხოვს.
მისი განცხადებით, დავით ფეიქრიშვილისა და მისი შვილიშვილის, ნიკო ფეიქრიშვილის ტელეფონები სამართალდამცველებმა დავითის საცხოვრებელი სახლიდან ამოიღეს.
„როგორ მოხვდა ამ დამნაშავეების ხელში, რომლებიც ამ ტელეფონით აჩვენებდნენ ჩემს შვილს და ეს ზუსტად ის ტელეფონებია – იყო ლაპარაკი, „ეს გახსენი, ის გახსენი, ეს გვაჩვენე“, – განაცხადა აბრამიშვილმა.
მისივე მტკიცებით, საკანში შეტანილი იყო სპეციალური აპარატურაც, რომლის საშუალებითაც ინტერნეტთან დაკავშირება ხდებოდა. აბრამიშვილი საუბრობს სავარაუდო ცემასა და არასათანადო მოპყრობაზე და გამოძიებას მოითხოვს.
ბრალდებულების დედამ ბიძინა ივანიშვილსა და მთავრობას მიმართა. მისი შეფასებით, პასუხისმგებლობა მხოლოდ უწყებების ხელმძღვანელების შეცვლით არ უნდა შემოიფარგლოს და შესაძლო დანაშაულში მონაწილე თანამშრომლების ვინაობაც უნდა დადგინდეს.
„ამ ქვეყანაში ჩემს შვილებს რომ დაუძახებენ კრიმინალს, მაშინ ყველა კრიმინალის სახელი უნდა დასახელდეს. ნუ გაუფრთხილდებით „პაგონიან“ კრიმინალებს“, – აღნიშნა მან.
აბრამიშვილმა ასევე მოითხოვა განმარტება ვატო ყიფიანის საქართველოში ჩამოსვლის გარემოებებზე და ამ კონტექსტში მამუკა მდინარაძე ახსენა. მისი ვარაუდით, საქმე ქვეყანაში დესტაბილიზაციისა და ციხეში ბუნტის მოწყობის გეგმას უკავშირდებოდა.
მან გააკრიტიკა პაატა სალიას განცხადებაც და აღნიშნა, რომ მისგან მთავარ კითხვებზე პასუხები ვერ მიიღო.
ნინო აბრამიშვილის თქმით, ის შვილების პატიმრობიდან გათავისუფლებას არ ითხოვს – მათი დამნაშავეობის საკითხი სასამართლომ უნდა გადაწყვიტოს. მისი მოთხოვნა სავარაუდო ძალადობისა და დალუქული ნივთმტკიცებების შესაძლო გადაცემის გარემოებების გამოძიებაა.
