„სტრატეგია აღმაშენებლის“ ლიდერი გიორგი ვაშაძე დღეს პარტია „ქართული ოცნების“ დამფუძნებლის ბიძინა ივანიშვილის მიერ გავრცელებულ განცხადებას გამოეხმაურა.
მისი თქმით, წერილი არაერთ რამეს ადასტურებს, მათ შორის იმას, რომ დღეს ქვეყანაში ოლიგარქიული მმართველობაა.
„ეს წერილო დასტურია, რომ დღეს ნამდვილდ არის ოლიგარქიული მმართველობა და სწორედ ბიძინა ივანიშვილი განსაზღვრავს ყველაფერს. მეორე, წერილი დასტურია, რომ ის ტრიო არის სწორედ მისი მეორე პროექტი, რომლითაც საქართველოს ბედს ეთამაშება. მესამე, ეს წერილი დასტურია, რომ დასავლეთზე, ევროპაზე, ამერიკაზე, ამერიკის და ევროკავშირის ელჩზე შეტევის მთავარი ავტორი ბიძინა ივანიშვილია. წერილი დასტურია იმის, რომ ევროკავშირის კანდიდატის სტატუსი ჩვენ ვერ მივიღეთ სწორედ მის გამო. წერილი დასტურია, რომ კანონები, რომლებმაც დაგვაშორა ევროპას, ე.წ. მოსმენების კანონი და ნაბიჯები, რომლებიც იყო გადადგმული თებერვლიდან მოყოლებული, მათ შორის გვარამიას დაკავება პრემიერის ევროპაში ვიზიტის დროს, სწორედ მისი დაგეგმილია. რაც ყველაზე მნიშვნელოვანია, ეს წერილი დასტურია იმის, რომ ვიდრე ჩვენ ივანიშვილს მიტაცებულ ძალაუფლებას არ წავართმევთ და ხალხს არ დავუბრუნებთ ამ ძალაუფლებას, წინ ვერ წავალთ.
სამწუხაროდ, მისი ფინანსური ინტერესების მსხვერპლია დღეს საქართველო და ჩვენი ევროატლანტიკური ინტეგრაციის გზა. ბიძინა ივანიშვილი პოლიტიკიდან არსად წასულა, შესაბამისად, ფორმალურად თუ არაფორმალურად დაბრუნდება თუ არა პოლიტიკაში, ამას ვნახავთ. თუ ამ წერილიდან დასკვნას არ გავაკეთებთ, ჩვენ გადავიჩეხებით. სამწუხაროდ, ძალიან მძიმე ბედი ელის საქართველოს მის ხელში. საქართველო მისი ფინანსური ინტერესების მსხვერპლია. სწორედ ცრუ დილემების მთავარი ავტორი არის ბატონი ივანიშვილი. ეს წერილი ამის დასტურია და სწორედ ეს ცრუ დილემა არის საქართველოში თითქოსდა ომის საფრთხე. ამის ავტორიც ეს ადამიანია. ამ წერილით რეალურად, თავიდან ბოლომდე გაიშიშვლა თავი ბატონმა ივანიშვილმა“, – განაცხადა გიორგი ვაშაძემ.
