„ქართული ოცნება“ საკონსტიტუციო სასამართლოში წარდგენილ სარჩელს პარტია „გახარია საქართველოსთვის“ აკრძალვის მოთხოვნასაც დაამატებს. ამის შესახებ საპარლამენტო უმრავლესობის ლიდერმა ირაკლი კირცხალიამ განაცხადა.
კირცხალიას თქმით, განახლებული სარჩელი საკონსტიტუციო სასამართლოს მიმდინარე კვირაში წარედგინება. მან განმარტა, რომ თავდაპირველად გახარიას პარტიის აკრძალვა არ მოუთხოვიათ, რადგან მას საპარლამენტო საქმიანობაში ჩართვის „შანსი მისცეს“, თუმცა, მისი შეფასებით, პარტიის შემდგომმა მოქმედებებმა ეს გადაწყვეტილება შეცვალა.
„ნახეთ პირდაპირი, უხეში და თავხედური არაღიარება კონსტიტუციური წყობილებისა ჩვენს ქვეყანაში, ამის ირგვლივ კი უამრავი მათი დესტრუქციული ქმედება პარლამენტს შიგნით თუ მათ კომენტარებში“, — განაცხადა კირცხალიამ.
მისივე თქმით, „ქართული ოცნება“ „გახარია საქართველოსთვის“ წარმომადგენლებისთვის პარლამენტსა და საკრებულოებში დეპუტატის მანდატების შეწყვეტას არ ითხოვს.
მმართველ პარტიას საკონსტიტუციო სასამართლოში მანამდე უკვე ჰქონდა შეტანილი სარჩელი „ერთიანი ნაციონალური მოძრაობის“, „კოალიცია ცვლილებისთვის“, „ძლიერი საქართველო — ლელოსა“ და „ფედერალისტების“ არაკონსტიტუციურად ცნობისა და აკრძალვის მოთხოვნით.
