2026 წლის აგვისტოს მდგომარეობით, საქართველოს მთლიანი საერთაშორისო რეზერვები წლიურად 56.4%-ით გაიზარდა და ისტორიულ მაქსიმუმს — 8.14 მილიარდ აშშ დოლარს მიაღწია. ინფორმაციას საქართველოს ეროვნული ბანკი ავრცელებს.
სებ-ის მონაცემებით, მხოლოდ ერთი თვის განმავლობაში საერთაშორისო რეზერვები 613 მილიონი დოლარით გაიზარდა. ამასთან, გაუმჯობესდა რეზერვების ადეკვატურობის მაჩვენებელიც — საერთაშორისო სავალუტო ფონდის ARA მეთოდოლოგიით ის 128.2%-ს შეადგენს და რეკომენდებულ 100%-იან ზღვარს აღემატება.
ეროვნული ბანკის განცხადებით, ბოლო ორ წელიწადში, 2024 წლის ოქტომბერთან შედარებით, საქართველოს საერთაშორისო რეზერვების მოცულობა გაორმაგდა. 2026 წლის იანვარ-ივლისში სებ-ის მიერ განხორციელებულმა წმინდა სავალუტო შესყიდვებმა ჯამურად 2.5666 მილიარდი დოლარი შეადგინა. აგვისტოს წმინდა შესყიდვების მონაცემები 25 სექტემბერს გამოქვეყნდება.
რეზერვების ზრდაში მნიშვნელოვანი წვლილი შეიტანა მონეტარულმა ოქრომაც. სებ-მა ოქროში პირველი ინვესტიცია 2024 წელს განახორციელა, ხოლო 2026 წლის ივნისში დამატებით 100 მილიონი დოლარის მონეტარული ოქრო შეიძინა.
აგვისტოში ოქროს ფასის ცვლილების შედეგად მონეტარული ოქროს ღირებულება წინა თვესთან შედარებით 135 მილიონი დოლარით გაიზარდა და 1.1492 მილიარდ დოლარს მიაღწია. ოქროს წილი საქართველოს მთლიან საერთაშორისო რეზერვებში 14.1%-ია.
საერთაშორისო რეზერვების შესახებ განახლებულ მონაცემებს ეროვნული ბანკი 7 ოქტომბერს გამოაქვეყნებს.
