ევროკავშირმა შესაძლოა რუსული სანქციების გვერდის ავლა დანაშაულად გამოაცხადოს.
ინიციატივა ევროკომისიას ეკუთვნის.
შეთავაზებული წინადადება საშუალებას მისცემს ევროკავშირის წევრი სახელმწიფოების მთავრობებს, იმ კომპანიების და კერძო პირების ქონების კონფისკაცია მოახდინოს, ვინც ეცდება, მოსკოვის მიმართ ევროკავშირის სანქციები თავიდან აიცილოს.
რუსეთის მიმართ დაწესებული სანქციების დარღვევა ევროკავშირის 12 ქვეყანაში სისხლის სამართლის დანაშაულად არის გამოცხადებული, 13 ქვეყანაში - სისხლის სამართლის ან ადმინისტრაციული სახის დანაშაულად, 2 ქვეყანაში კი ამას მხოლოდ ადმინისტრაციულ სამართალდარღვევად თვლიან.
ევროკომისიის ინიციატივის მიზანია, წევრი ქვეყნების მიდგომა ერთიანი გახდეს და სანქციების დარღვევა სერიოზულ დანაშაულად ჩაითვალოს ევროკავშირის 27-ვე ქვეყანაში.
ამ დროისთვის ევროკავშირმა გაყინა იმ რუსი ოლიგარქების კუთვნილი 10 მილიარდი ევროს ოდენობის კერძო აქტივები და 20 მილიარდ ევროზე მეტის ოდენობის საბანკო ანგარიშები, რომლებიც კრემლს უკრაინის წინააღმდეგ ომში ეხმარებოდნენ.
მაგრამ სანამ ამ აქტივების კონფისკაცია და გაყიდვა მოხდება, ოლიგარქები უნდა გასამართლდნენ რუსეთის მიმართ დაწესებული სანქციების თავიდან აცილებისთვის და ჩამორთმეული ქონება მხოლოდ ამ დანაშაულთან უნდა იყოს დაკავშირებული.
ევროკავშირის ახალი საკანონმდებლო ინიციატივა, რომელიც ევროკავშირის ყველა ქვეყანამ ერთხმად უნდა მიიღოს, ასევე მხარდაჭერილი უნდა იყოს ევროპარლამენტის უმრავლესობის მიერ.
ინიციატივა გულისხმობს იმათ დასჯასაც, ვინც დაეხმარება სანქცირებულ პირებს, გვერდი აუარონ დაწესებულ შეზღუდვებს, მაგალითად, იურისტებს ან ბანკირებს.
ევროკომისიის საკანონმდებლო წინადადებით ასევე შეთავაზებულია აქტივების კონფისკაციის გაადვილება. ეს შესაძლებლობას მისცემს ევროკავშირს, დაუყოვნებლივ გამოიტანოს მათი გაყინვის გადაწყვეტილება მანამ, სანამ მფლობელები მათ გადატანას შეძლებენ.
ევროკომისია ამბობს, რომ ევროკავშირში კრიმინალური დაჯგუფებების აქტივების ოდენობა 139 მილიარდ ევროს აღწევს, ამ დროისთვის კი მათი მხოლოდ 2%-ია გაყინული, ხოლო თავის მხრივ, გაყინული აქტივების მხოლოდ ნახევარია ჩამორთმეული.
