პუტინის მსგავსი დიქტატორები უნდა შეჩერდნენ და მათ აგრესიას წინააღმდეგობა უნდა გაეწიოს, რაც არ უნდა მაღალი იყოს წინააღმდეგობის ფასი. ამის შესახებ აშშ-ის პრეზიდენტმა ჯო ბაიდენმა ალაბამაში, Lockheed Martin-ის ქარხანაში განაცხადა, სადაც Javelin-ის სისტემები იწარმოება.
„ისტორიამ გვაჩვენა, თუ დიქტატორებს არ შეაჩერებ, მათ უფრო მეტი უნდათ“, - თქვა ბაიდენმა.
მან აღნიშნა, ორი თვის განმავლობაში, რაც რუსეთი უკრაინაში შეიჭრა შეერთებულმა შტატებმა უკრაინას უსაფრთხოების უზრუნველსაყოფად 3 მილიარდ დოლარზე მეტი დახმარება გაუწია.
„ეს ფული არის პირდაპირი ინვესტიცია თავისუფლებისა და დემოკრატიის დასაცავად“, - თქვა მან.
ბაიდენმა ხაზგასმით აღნიშნა, რომ კრემლის დიქტატორის წინააღმდეგ ბრძოლის ღირებულება "არ იქნება იაფი, მაგრამ მაგრამ აგრესიის შეგუება უფრო ძვირი დაჯდება“
Javelin-ის ტანკსაწინააღმდეგო სარაკეტო სისტემებიდან 5000-ზე მეტი ერთეული უკვე გადაეცა უკრაინას რუსული აგრესიის მოსაგერიებლად. პენტაგონმა აღიარა, რომ უკრაინის შეიარაღებული ძალები ამ იარაღს ძალიან ეფექტურად იყენებენ.
ფოტო: Getty Images
