პარლამენტის თავმჯდომარემ და თბილისის მაჟორიტარმა დეპუტატებმა უკრაინელ მოსწავლეებს ფორტეს და შვიდკაცას CD დისკები აჩუქეს.
უკრაინაში რუსეთის შეჭრის შედეგად ლტოლვილად ქცეულ ბავშვებს თბილისში საქართველოს პარლამენტმა უმასპინძლა.
"დარწმუნებული ვარ, საქართველოში ყოფნა თქვენთვის საინტერესო იქნება. ბევრ ცოდნას და ახალ მეგობარს შეიძენთ თანაკლასელების სახით. ყველას გისურვებთ, საინტერესო პერიოდი გქონოდეთ საქართველოში, ესაუბრეთ და გაუცვალეთ ემოციები თქვენს თანაკლასელებს, დაგეგმეთ ექსკურსიები - ჩვენ შესაძლებლობების ფარგლებში, ყველაფერში დაგეხმარებით. მობრძანდით პარლამენტშიც. მიხარია, რომ აქ ხართ. მადლობას ვუხდი პედაგოგებს, სკოლებს და განათლების სამინისტროს, რომ ინიციატივა უკრაინელი მოსწავლეების სკოლებში გადანაწილებასთან დაკავშირებით ასე სწრაფად განხორციელდა". - მიმართა პაპუაშვილმა უკრაინელ მოსწავლეებს.
პარლამენტის ცნობით, სკოლის მოსწავლეები, მათი მშობლები და პედაგოგები ტრამვაით გაემგზავრებიან მთაწმინდის პარკში, სადაც ისინი მთელი დღის განმავლობაში ულიმიტო აბონიმენტით ისარგებლებენ.
