„ბატონო პაატა, გთხოვთ, გამათავისუფლოთ დაკავებული თანამდებობიდან“, – ნათქვამია პატარიძის განცხადებაში.
აღნიშნულ გადაწყვეტილებას წინ უძღოდა საქართველოს პროკურატურის მიმართვა იუსტიციის სამინისტროსადმი, რომლითაც საგამოძიებო უწყებამ გიორგი პატარიძისთვის უფლებამოსილების შეჩერების რეკომენდაცია გასცა.
პროკურატურის ეს გადაწყვეტილება დავით ფეიქრიშვილთან დაკავშირებულ საქმეზე მიმდინარე გამოძიების ფონზე გახდა ცნობილი.
როგორც პროკურატურაში „ინტერპრესნიუსს“ განუცხადეს, სისხლის სამართლის საქმე იუსტიციის სამინისტროს გენერალური ინსპექციიდან გამოსაძიებლად გენერალური პროკურატურის საგამოძიებო ნაწილს გადაეცა.
„აღნიშნული სისხლის სამართლის საქმე საქართველოს იუსტიციის სამინისტროს გენერალური ინსპექციიდან გამოსაძიებლად გადაეცა საქართველოს გენერალური პროკურატურის საგამოძიებო ნაწილს. სისხლის სამართლის საქმეზე ინტენსიურ რეჟიმში მიმდინარეობს ყველა აუცილებელი საგამოძიებო და საპროცესო ღონისძიება“, – განაცხადეს უწყებაში.
პროკურატურამ ასევე დაადასტურა, რომ იუსტიციის სამინისტროს გიორგი პატარიძისთვის უფლებამოსილების შეჩერების რეკომენდაციით მიმართა.
ამ ეტაპზე უცნობია, დააკმაყოფილა თუ არა იუსტიციის მინისტრმა პატარიძის განცხადება და ოფიციალურად გათავისუფლდა თუ არა იგი თანამდებობიდან.
პროკურატურას არ დაუკონკრეტებია, რა გარემოებები გამოიკვეთა დავით ფეიქრიშვილთან დაკავშირებულ გამოძიებაში ან კონკრეტულად რამ განაპირობა პენიტენციური სამსახურის ხელმძღვანელისთვის უფლებამოსილების შეჩერების რეკომენდაცია.
