ამის შესახებ პროკურატურაში „ინტერპრესნიუსს“ განუცხადეს. სააგენტო დაინტერესდა, რა ეტაპზეა დავით ფეიქრიშვილთან დაკავშირებული ინფორმაციის საფუძველზე დაწყებული გამოძიება და რა გარემოებები გამოიკვეთა ამ დროისთვის.
პროკურატურის ინფორმაციით, საქმე იუსტიციის სამინისტროს გენერალური ინსპექციიდან გამოსაძიებლად გენერალური პროკურატურის საგამოძიებო ნაწილს გადაეცა.
„აღნიშნული სისხლის სამართლის საქმე საქართველოს იუსტიციის სამინისტროს გენერალური ინსპექციიდან გამოსაძიებლად გადაეცა საქართველოს გენერალური პროკურატურის საგამოძიებო ნაწილს. სისხლის სამართლის საქმეზე ინტენსიურ რეჟიმში მიმდინარეობს ყველა აუცილებელი საგამოძიებო და საპროცესო ღონისძიება“, – განაცხადეს უწყებაში.
ამასთან, პროკურატურამ დაადასტურა, რომ იუსტიციის სამინისტროს გიორგი პატარიძისთვის უფლებამოსილების შეჩერების რეკომენდაციით მიმართა.
„საქართველოს პროკურატურამ რეკომენდაციით მიმართა საქართველოს იუსტიციის სამინისტროს, შეუჩერდეს უფლებამოსილება საქართველოს იუსტიციის სამინისტროს სპეციალური პენიტენციური სამსახურის გენერალურ დირექტორს, გიორგი პატარიძეს“, – ნათქვამია პროკურატურის პასუხში.
პროკურატურას არ დაუკონკრეტებია, რა გარემოებებმა განაპირობა აღნიშნული რეკომენდაცია ან რა შედეგები გამოიკვეთა გამოძიების ამ ეტაპზე.
ამ დროისთვის ასევე უცნობია, მიიღო თუ არა იუსტიციის სამინისტრომ გიორგი პატარიძისთვის უფლებამოსილების შეჩერების გადაწყვეტილება.
მნიშვნელოვანია: პროკურატურის რეკომენდაცია არ ნიშნავს, რომ გიორგი პატარიძეს უფლებამოსილება უკვე შეუჩერდა ან მის მიმართ სისხლისსამართლებრივი ბრალდებაა წარდგენილი. გავრცელებულ ინფორმაციაში არც ერთი ეს გარემოება დადასტურებული არ არის.
