ამის შესახებ უკრაინის პრეზიდენტმა CNN-თან ინტერვიუში განაცხადა.
ზელენსკის თქმით, მასსა და აშშ-ის პრეზიდენტ დონალდ ტრამპს შორის პირადი დაპირისპირება არ არსებობს, თუმცა რუსეთის წინააღმდეგ სანქციების გაუქმებას კატეგორიულად ეწინააღმდეგება.
„ჩემი დამოკიდებულება პუტინის მიმართ სრულიად ნათელია. მიმაჩნია, რომ თუ სანქციებს გავაუქმებთ, მას გავაძლიერებთ. არაფერი პირადული ჩემსა და პრეზიდენტ ტრამპს შორის. რა თქმა უნდა, სანქციების გაუქმების წინააღმდეგი ვარ“, – განაცხადა ზელენსკიმ.
უკრაინის პრეზიდენტმა ნორვეგიის დედაქალაქ ოსლოში გამართული შეხვედრები ნაყოფიერად შეაფასა, თუმცა აღნიშნა, რომ რუსეთის პრეზიდენტის სამშვიდობო განზრახვების არ სჯერა.
„პუტინი თამაშობს, იცით, ის მოთამაშეა. სამწუხაროა, რადგან ის სხვა ადამიანების სიცოცხლით თამაშობს და, რა თქმა უნდა, არ სურს ომის შეწყვეტა. ამიტომ ჩვენი პარტნიორებისგან იმას ვითხოვთ, რომ მას გაძლიერებისა და ჩვენი გატეხვის შესაძლებლობა არ მისცენ“, – აღნიშნა ზელენსკიმ.
CNN-თან საუბრისას უკრაინის პრეზიდენტმა კიდევ ერთხელ დაადასტურა, რომ ომის დასრულების მიზნით შესაძლებელია ფრონტის ამჟამინდელი ხაზის გასწვრივ ცეცხლის შეწყვეტაზე შეთანხმება, რათა შეწყდეს ადამიანების დაღუპვა და მხარეებმა მოლაპარაკებები დაიწყონ.
თუმცა ზელენსკიმ მკაფიოდ გამიჯნა ცეცხლის შეწყვეტა ტერიტორიული დათმობებისგან. მისი თქმით, უკრაინისთვის მიუღებელია რუსეთისთვის იმ ტერიტორიების გადაცემა, რომლებიც ამჟამად კიევის კონტროლქვეშაა. ამასთან, უკრაინა არც უკვე ოკუპირებულ ტერიტორიებზე რუსეთის სუვერენიტეტს აღიარებს.
„ჩვენი მიწა ძალიან მნიშვნელოვანია, რადგან საქმე ადამიანებს ეხება და არა კილომეტრებს. ბევრი ადამიანი დაიღუპა ამ მიწის, ჩვენი დამოუკიდებლობისა და ჩვენი ქვეყნის დაცვისას. ამ ტერიტორიებს, რომლებიც დროებით არის ოკუპირებული, არავინ აღიარებს რუსეთის ტერიტორიებად და, ვფიქრობ, რუსეთს ეს ესმის. სამწუხაროა, თუ ვინმეს ეს არ ესმის, მაგრამ ეს უკვე მათი საქმეა“, – განაცხადა უკრაინის პრეზიდენტმა.
ზელენსკის განცხადებებს წინ უძღოდა რუსეთის პრეზიდენტ ვლადიმერ პუტინის პოზიცია, რომელმაც უკრაინის ტერიტორიულ დანაკარგებზე საუბარს უადგილო უწოდა და კვლავ გაიმეორა მოსკოვის პრეტენზია უკრაინის ოკუპირებულ ტერიტორიებზე.
„ეს მათი ტერიტორია არ არის, ეს ისტორიული რუსეთის ტერიტორიაა. მით უმეტეს, რომ ამ ტერიტორიებზე მცხოვრებმა ადამიანებმა, ჯერ ერთი, სახელმწიფოებრივი დამოუკიდებლობის სასარგებლოდ მისცეს ხმა, ხოლო მეორე ეტაპზე რუსეთის ფედერაციასთან შეერთებას დაუჭირეს მხარი“, – განაცხადა პუტინმა.
რუსეთის პრეზიდენტის თქმით, ტერიტორიულ დანაკარგებზე საუბარი უადგილოა და აღნიშნულ საკითხზე დავა უსასრულოდ შეიძლება გაგრძელდეს.
რუსეთის მიერ უკრაინის ტერიტორიების ანექსია საერთაშორისო საზოგადოების უდიდესი ნაწილის მიერ არ არის აღიარებული. უკრაინა და მისი პარტნიორები რუსეთის მიერ ოკუპირებულ ტერიტორიებს უკრაინის საერთაშორისოდ აღიარებული საზღვრების ნაწილად მიიჩნევენ.
