ქობულეთის მუნიციპალიტეტის ერთ-ერთ სოფელში არასრულწლოვანი შვილის მიმართ გარყვნილი ქმედების ბრალდებით მამა დააკავეს. საქმეზე გამოძიება საქართველოს სისხლის სამართლის კოდექსის 11 პრიმა-141-ე მუხლით მიმდინარეობს.
„ინტერპრესნიუსის“ ინფორმაციით, სავარაუდო დანაშაულის დროს 15 წლის გოგონა სახლში მამასთან ერთად მარტო იმყოფებოდა. მომხდარის შესახებ არასრულწლოვანმა დედას შეატყობინა, რომელიც იმ დროს სამსახურში იყო.
მოზარდის დედამ ინფორმაციის მიღების შემდეგ შინაგან საქმეთა სამინისტროს მიმართა, რის საფუძველზეც სამართალდამცველებმა გამოძიება დაიწყეს.
შინაგან საქმეთა სამინისტროში ადასტურებენ, რომ გამოძიება ოჯახის წევრის მიერ არასრულწლოვნის მიმართ ჩადენილი გარყვნილი ქმედების მუხლით მიმდინარეობს.
უწყების ინფორმაციით, საქმეზე უკვე ჩატარდა გამოკითხვა და დაინიშნა შესაბამისი ექსპერტიზა.
გამოძიება მომხდარის გარემოებებს ადგენს.
წყარო: „ინტერპრესნიუსი“.
