ამის შესახებ გოცირიძე სოციალურ ქსელში წერს და აღნიშნავს, რომ ფულის ფორმა ისტორიულად ყოველთვის იცვლებოდა ეკონომიკური და ტექნოლოგიური გარემოს შესაბამისად.
„ციფრულ სამყაროში ციფრული ფულის გაჩენა გარდაუვალი იყო, ისევე როგორც ელექტრონულ ერაში – ელექტრონულის“, – აცხადებს გოცირიძე.
მისი განმარტებით, ფული მხოლოდ მონეტა ან ქაღალდის ბანკნოტი არ არის. ის ინფორმაციის შენახვისა და გადაცემის მექანიზმიცაა, რომელიც ადამიანებს შორის ღირებულების გაცვლას უზრუნველყოფს.
გოცირიძე აღნიშნავს, რომ აგრარულ ეპოქაში ამ ფუნქციას საქონელი და ძვირფასი ლითონები ასრულებდა, ინდუსტრიული განვითარებისა და საერთაშორისო ვაჭრობის გაფართოებამ ქაღალდის ფულის გავრცელებას შეუწყო ხელი, ელექტრონულ ეპოქაში კი საბანკო გადარიცხვები და პლასტიკური ბარათები დამკვიდრდა.
მისი შეფასებით, თანამედროვე ციფრულ ეკონომიკაში ფულის შემდგომი ტრანსფორმაცია ლოგიკური პროცესია, რომელსაც მნიშვნელოვანი უპირატესობებიც აქვს.
„საბოლოო ჯამში, ციფრული ფული ორლესული ხმალივითაა. ერთ მხარეს უზარმაზარი სიკეთეა – მყისიერი სიჩქარე, დაბალი დანახარჯები და გლობალური ხელმისაწვდომობა, ხოლო მეორე მხარეს – სერიოზული საფრთხეები“, – წერს გოცირიძე.
ყოფილი პარლამენტარი განსაკუთრებულ ყურადღებას ამახვილებს კიბერუსაფრთხოებასა და სახელმწიფოს მხრიდან მოქალაქეთა ფინანსური საქმიანობის კონტროლის შესაძლებლობაზე.
მისი განცხადებით, არადემოკრატიულ სახელმწიფოებში ცენტრალური ბანკის ციფრული ვალუტა შესაძლოა გამოყენებული იქნეს მოქალაქეთა ტრანზაქციების გასაკონტროლებლად, ფინანსური თავისუფლების შესაზღუდად ან კონკრეტული პირებისთვის ფინანსურ რესურსებზე წვდომის დასაბლოკად.
„სახელმწიფო (ცენტრალიზებულმა) ციფრულმა ვალუტამ არადემოკრატიულ რეჟიმებს შეიძლება მისცეს ბერკეტი, აკონტროლონ მოქალაქეთა თითოეული ტრანსაქცია, შეზღუდონ ფინანსური თავისუფლება ან თუნდაც „გამოურთონ“ ფინანსებზე წვდომა არასასურველ პირებს“, – აცხადებს გოცირიძე.
მისი აზრით, ციფრული ვალუტის შესაძლო დანერგვა არ უნდა ნიშნავდეს ნაღდი ფულისა და ტრადიციული საბანკო ანგარიშსწორების გაუქმებას.
გოცირიძე მიიჩნევს, რომ მოქალაქეებს გადახდის სხვადასხვა საშუალების გამოყენების შესაძლებლობა უნდა შეუნარჩუნდეთ, რისთვისაც აუცილებელია შესაბამისი კონსტიტუციური გარანტიების შექმნა.
„მნიშვნელოვანია, რომ საკონსტიტუციო დონეზე მუდამ იყოს გარანტირებული როგორც ქაღალდის ფულის, ისე ტრადიციული საბანკო ანგარიშსწორების შეუფერხებელი არსებობა“, – აღნიშნავს ის.
ამასთან, ყოფილი პარლამენტარი საზოგადოებას მოუწოდებს, ციფრული ფულის საკითხს ზედმეტი შიშისა და პანიკის გარეშე მიუდგეს.
მისი თქმით, ტექნოლოგიურ სიახლეებთან დაკავშირებული საფრთხეები რეალისტურად უნდა შეფასდეს და არ უნდა გადაიზარდოს უსაფუძვლო წარმოდგენებში, როგორიც წარსულში ელექტრონულ პირადობის მოწმობებთან დაკავშირებული შიშები იყო.
გოცირიძის შეფასებით, ციფრული ვალუტის დანერგვის შემთხვევაში აუცილებელია კიბერუსაფრთხოების მაღალი სტანდარტების, პირადი მონაცემების კონფიდენციალურობის, ეფექტიანი რეგულირებისა და მომხმარებელთა ციფრული განათლების უზრუნველყოფა.
„რეალური რისკებისგან თავის დასაცავად საჭიროა მტკიცე კონსტიტუციური გარანტიები, სიფრთხილე და აუჩქარებლობა“, – წერს ის.
რაც შეეხება საქართველოში ციფრული ლარის შესაძლო შემოღებას, გოცირიძე აცხადებს, რომ ეროვნული ბანკის ციფრული ფულის დანერგვა უახლოესი მომავლის საკითხი არ არის.
მისივე თქმით, ციფრული ვალუტის შემოღების პროცესში გასათვალისწინებელ კონკრეტულ მექანიზმებსა და უსაფრთხოების გარანტიებზე დეტალურად მოგვიანებით ისაუბრებს.
