გვარამიას შეფასებით, ტელეკომპანიის საინფორმაციო სამსახურის ხელმძღვანელის, ნათია სონღულაშვილის მიერ საკუთარი წილის გასხვისება მხოლოდ მესაკუთრეთა ცვლილება არ არის და მას პოლიტიკური მნიშვნელობაც აქვს.
„„იმედის“ წილი ნათია სონღულაშვილისთვის (საინფორმაციოს უფროსი) ჩამოურთმევიათ და მაგდა ანიკაშვილისთვის გადაუფორმებიათ. ნათია სონღულაშვილს „იმედის“ საინფორმაციოს უფროსობასაც ჩამოართმევენ. ადამიანურ ენაზე: ტვ „იმედიდან“ მამუკა მდინარაძე ამოშანთეს“, – აცხადებს გვარამია.
ოპოზიციონერი პოლიტიკოსი ვარაუდობს, რომ სონღულაშვილი ტელეკომპანიის საინფორმაციო სამსახურის ხელმძღვანელის თანამდებობასაც დატოვებს. ამ ეტაპზე აღნიშნული საკადრო ცვლილების შესახებ ოფიციალური ინფორმაცია არ გავრცელებულა.
რაც შეეხება ტელეკომპანიის წილებს, საჯარო რეესტრის მონაცემების მიხედვით, „იმედის“ ერთ-ერთი თანამფლობელი მაგდა ანიკაშვილი გახდა, რომელიც კომპანიის 25%-იან წილს ფლობს.
რეესტრის ამონაწერის თანახმად, ნათია სონღულაშვილმა საკუთარი 10%-იანი წილი მაგდა ანიკაშვილს 100 ლარად მიჰყიდა.
შესაბამისი დოკუმენტები საჯარო რეესტრმა დღეს, 16 ოქტომბერს დაარეგისტრირა.
ნიკა გვარამია აღნიშნულ ცვლილებას მამუკა მდინარაძის ტელეკომპანიაზე გავლენის დაკარგვად აფასებს, თუმცა საჯარო რეესტრში წილების გადაფორმების ფაქტი თავისთავად არ ადასტურებს მის მიერ დასახელებულ პოლიტიკურ მიზეზებს.
ამ დროისთვის უცნობია, უკავშირდება თუ არა მესაკუთრეთა სტრუქტურის ცვლილება ტელეკომპანიის მენეჯმენტში მოსალოდნელ საკადრო გადაწყვეტილებებს.
მამუკა მდინარაძის, ნათია სონღულაშვილისა და ტელეკომპანია „იმედის“ ოფიციალური პოზიციები გვარამიას განცხადებასთან დაკავშირებით გავრცელებულ ინფორმაციაში წარმოდგენილი არ არის.
