დედაქალაქის მერის, კახა კალაძის განცხადებით, დიდი დიღმიდან მეტროსადგურ „დიდუბემდე“ ტრამვაის ხაზის პროექტირებასა და მშენებლობას თურქეთში რეგისტრირებული ერთობლივი საწარმო EYE (Emre Ray + Yüksel + Erk) განახორციელებს.
თბილისის მთავრობის სხდომაზე კალაძემ განაცხადა, რომ საერთაშორისო ტენდერში მონაწილეობა ოთხმა მსხვილმა კომპანიამ მიიღო, რომელთაგან სამი თურქეთში, ერთი კი ჩინეთში არის რეგისტრირებული.
მისი თქმით, გამარჯვებულად EYE გამოცხადდა, რადგან ყველაზე დაბალი ფასი წარადგინა, ხოლო პროექტი ხელშეკრულების გაფორმებიდან 36 თვეში უნდა დასრულდეს.
„წარმოდგენილი წინადადებების შეფასება უკვე დასრულებულია, გვყავს გამარჯვებული კომპანია, თურქეთში რეგისტრირებული კომპანია EYE (Emre Ray + Yüksel + Erk), რომელმაც ყველაზე დაბალი ფასი წარმოადგინა. ADB-ის შესყიდვების წესების შესაბამისად, განსაზღვრულია ე.წ. გასაჩივრების 14-დღიანი პერიოდი, რომლის გასვლის შემდეგ გამარჯვებულ კომპანიასთან ხელშეკრულებას გავაფორმებთ“, – განაცხადა კალაძემ.
მისივე ინფორმაციით, პროექტი სამ ეტაპს მოიცავს: კონცეპტუალური პროექტის მომზადებას, დეტალური პროექტის შემუშავებასა და სამშენებლო სამუშაოების შესრულებას.
ტრამვაის ხაზი დიდი დიღმის მე-3 და მე-4 მიკრორაიონების მიმდებარე ტერიტორიიდან დაიწყება, დავით აღმაშენებლის ხეივნისა და დიღმის მასივის გავლით გაივლის და მეტროსადგურ „დიდუბეს“ დაუკავშირდება.
პროექტის მიხედვით:
- ტრამვაის ხაზის სიგრძე დაახლოებით 7,5 კილომეტრი იქნება;
- მოეწყობა 11 გაჩერება;
- აშენდება ტრამვაის დეპო, რომელიც 11 შემადგენლობის მომსახურებას შეძლებს;
- მოგვიანებით გამოცხადდება ცალკე ტენდერი 10 ერთეული ტრამვაის შესაძენად.
„ძალიან მნიშვნელოვანი პროექტია და ძალიან მიხარია, რომ ქალაქს დაუბრუნდება ისეთი მნიშვნელოვანი საზოგადოებრივი ტრანსპორტი, როგორიც არის ტრამვაი. იმედი მაქვს, ეს არ იქნება პირველი და ბოლო მსგავსი პროექტი“, – განაცხადა კახა კალაძემ.
