უკრაინის პრეზიდენტის, ვოლოდიმირ ზელენსკი განცხადებით, რუსეთმა უკრაინის წინააღმდეგ მორიგი მასშტაბური იერიშის დროს 70-ზე მეტი რაკეტა და 500 უპილოტო საფრენი აპარატი გამოიყენა.
ზელენსკის ინფორმაციით, თავდასხმის შემდეგ კიევში სამძებრო-სამაშველო სამუშაოები ამ დრომდე გრძელდება.
„რუსეთმა უკრაინის წინააღმდეგ 70-ზე მეტი რაკეტა და 500 დრონი გამოიყენა. სამწუხაროდ, რუსეთის დარტყმების შედეგად 13 ადამიანი დაიღუპა და 90-ზე მეტი დაშავდა. კიევში დარტყმები 20-ზე მეტ ობიექტზე განხორციელდა, მათ შორის უმეტესობა საცხოვრებელი შენობაა. ასევე დაზიანდა სასწრაფო დახმარების ცენტრი, კვლევითი ინსტიტუტი, სასტუმრო და სხვადასხვა ბიზნესები“, – წერს ვოლოდიმირ ზელენსკი სოციალურ ქსელ X-ში.
მისივე თქმით, უკრაინისთვის ამ ეტაპზე განსაკუთრებით მნიშვნელოვანია საჰაერო თავდაცვის სისტემების მიწოდების დაჩქარება.
„განსაკუთრებით მნიშვნელოვანია, რომ ანტიბალისტიკური შესაძლებლობების წარმოების შესახებ შეთანხმებების განხორციელებაში პროგრესს მივაღწიოთ. ასევე, ჩვენ იმედს ვამყარებთ აშშ-ის გადაწყვეტილებაზე Patriot-ის სისტემების ლიცენზიებთან და თანამშრომლობის სხვა ფორმებთან დაკავშირებით. ეს ის ნაბიჯებია, რომელთაც ამ ომის დასრულება და მსგავსი თავდასხმების აღკვეთა შეუძლიათ“, – განაცხადა უკრაინის პრეზიდენტმა.
თავის მხრივ, კიევის მერმა, ვიტალი კლიჩკო განაცხადა, რომ რუსეთის თავდასხმის შედეგად დაღუპულთა პატივსაცემად კიევში 3 ივლისი გლოვის დღედ გამოცხადდა.
