შინაგან საქმეთა სამინისტროს ინფორმაციით, არასრულწლოვნების ტრეფიკინგის ბრალდებით სამი პირი დააკავეს. მათ შორის არიან როგორც საქართველოს, ისე უცხო ქვეყნის მოქალაქეები.
უწყების ცნობით, გამოძიებით დადგინდა, რომ ბრალდებულებმა მატერიალური სარგებლის მიღების მიზნით ტრეფიკინგის სქემა შეიმუშავეს, რომელშიც საკუთარი არასრულწლოვანი შვილები ჩართეს.
„გამოძიებით დგინდება, რომ ბრალდებულები არასრულწლოვან შვილებს ფსიქოლოგიური ძალადობის გამოყენებით ბათუმში, ტურისტულ ადგილებსა და სხვა ტერიტორიებზე მოწყალების თხოვნასა და ყვავილებით ვაჭრობას აიძულებდნენ. ასევე დგინდება, რომ შეგროვილ თანხას ბრალდებულები ისაკუთრებდნენ“, – აცხადებენ შსს-ში.
უწყების ინფორმაციით, საქმეზე ჩატარებული ფარული საგამოძიებო მოქმედებების შედეგად სამართალდამცველებმა აღნიშნული ფაქტების დამადასტურებელი არაერთი მტკიცებულება მოიპოვეს.
ამ ეტაპზე დაზარალებული არასრულწლოვნები სახელმწიფო ზრუნვის სერვისცენტრებში არიან გადაყვანილი და, შსს-ის ცნობით, მათ ჯანმრთელობას საფრთხე არ ემუქრება.
გამოძიება საქართველოს სისხლის სამართლის კოდექსის 143² მუხლის მე-2 და მე-3 ნაწილებით მიმდინარეობს, რაც 17 წლამდე თავისუფლების აღკვეთას ითვალისწინებს.
