ჟურნალისტის, გურამ როგავას განცხადებით, მის მიმართ ძალადობის საქმეზე დაკავებული სპეცრაზმელი არ შეესაბამება იმ პირის ფიზიკურ აღწერილობას, რომელიც ვიდეოჩანაწერებში ჩანს.
სასამართლო პროცესის დაწყებამდე როგავამ განაცხადა, რომ ბრალდებულს პირველად ნახავს და მისი ვიზუალური იდენტიფიცირება სურს.
„უნდა ვნახო ის სპეცრაზმელი, რომელიც ჩემს საქმეზეა დაკავებული, მაგრამ მისი ფიზიკური აღწერილობა არ ემთხვევა იმ მონაცემებს, რაც ვიდეოში ჩანს. ამიტომ მინდა, პირადად ვნახო და ვიზუალური კონტაქტი დავამყარო“, – განაცხადა გურამ როგავამ.
მისი თქმით, ჟურნალისტური გამოძიების შედეგად გამოვლენილი პირი, რომლის შესახებაც პროკურატურას ინფორმაცია თავადაც მიაწოდეს, დღემდე გამოკითხული არ არის.
„ფორმულას“ ჟურნალისტური გამოძიების შედეგად გამოვლენილი პირი არ გამოუკითხავთ. მე და ელისო ჯარიაშვილმა პროკურატურას მივაწოდეთ მისი სახელი, გვარი, მისამართი და ისიც, თუ რომელ ქვედანაყოფში მსახურობდა, თუმცა თვე-ნახევარზე მეტი გავიდა და ეს პირი არც დაუბარებიათ. ეს მიჩენს კითხვებს, რომ ამ საქმის უკან რაღაც დიდი ხდება და ვიღაცამ თავის თავზე აიღო ის, რაც არ ჩაუდენია“, – განაცხადა როგავამ.
ცნობისთვის, პროკურატურამ 2024 წლის საპროტესტო აქციების დროს მომიტინგე ზვიად მაისაშვილის, პოლიტიკოს ლევან ხაბეიშვილისა და ჟურნალისტ გურამ როგავას მიმართ განხორციელებული ძალადობის ფაქტებზე ხუთი პირი, მათ შორის სამი ყოფილი და ერთი მოქმედი სპეცრაზმელი, ასევე შინაგან საქმეთა სამინისტროს დაცვის პოლიციის დეპარტამენტის ერთი მოქმედი თანამშრომელი დააკავა. ხუთივე ბრალდებულს სამსახურებრივი უფლებამოსილების ძალადობით გადამეტებას ედავებიან, ხოლო გურამ როგავას ეპიზოდზე დაკავებულ პირს დამატებით ჟურნალისტისთვის პროფესიულ საქმიანობაში ძალადობით ხელის შეშლის ბრალდებაც აქვს წარდგენილი.
