დროებით ოკუპირებულ ტერიტორიებზე, მათ შორის ხერსონის ოლქში, ყირიმსა და დონეცკში, დრონებით განხორციელებული თავდასხმების შემდეგ ელექტროენერგიის მასშტაბური გათიშვა მოხდა.
უკრაინული მედიის ინფორმაციით, რომელიც „ტელეგრამ“ არხებსა და ხერსონის ოლქის ოკუპირებული ნაწილის ე.წ. გუბერნატორის, ვოლოდიმირ სალდოს განცხადებას ეყრდნობა, ელექტროენერგიის მიწოდება სრულად ან ნაწილობრივ შეწყდა.
გავრცელებული ცნობებით, ყირიმში, მათ შორის სევასტოპოლსა და ქერჩში, აფეთქებების ხმები ისმოდა. ადგილობრივი მოსახლეობის ინფორმაციით, ბახჩისარაის რაიონის სოფელ ნეკრასოვკასთან მდებარე ელექტროქვესადგური დაზიანდა.
ამასთან, ღამით დრონებით თავდასხმის შემდეგ ხანძარი გაჩნდა დროებით ოკუპირებულ ქალაქ მელიტოპოლშიც.
„ხერსონის ოლქის ყველა რაიონი მთლიანად ან ნაწილობრივ ელექტროენერგიის გარეშეა“, – განაცხადა ვოლოდიმირ სალდომ.
თავდასხმების შედეგად მიყენებული ზარალის მასშტაბისა და დაზიანებული ინფრასტრუქტურის შესახებ დამატებითი ინფორმაცია ამ ეტაპზე არ ვრცელდება.
