ევროკავშირში გაწევრიანების მსურველ ქვეყნებს შორის პროგრესი არათანაბარია და ზოგიერთი კანდიდატის პროცესი შეფერხების ეტაპზეა. ამის შესახებ POLITICO ევროკომისიის ახალ ინიციატივაზე მომზადებულ სტატიაში წერს.
გამოცემის ინფორმაციით, ამჟამად ევროკავშირს ცხრა ოფიციალური კანდიდატი ქვეყანა ჰყავს. მათ შორის მონტენეგრო გაწევრიანების პროცესში ლიდერ კანდიდატად განიხილება, ხოლო უკრაინამ და მოლდოვამ უკვე დაიწყეს წევრობაზე მოლაპარაკებები.
ამავე დროს, POLITICO აღნიშნავს, რომ საქართველოს, სერბეთისა და თურქეთის გაწევრიანების განაცხადები სხვადასხვა მიზეზით შეფერხებულია.
გამოცემის ცნობით, ევროკომისია ახალ მექანიზმს განიხილავს, რომლის მიხედვითაც კანდიდატ ქვეყნებს ევროკავშირთან დაახლოების პროცესში გარკვეული ეკონომიკური სარგებლის მიღება სრულ წევრობამდე შეეძლებათ. მიზანი რეფორმების სტიმულირება და კანდიდატი ქვეყნების ევროპულ გზაზე შენარჩუნებაა.
