ევროკომისია გეგმავს, ევროკავშირის კანდიდატ ქვეყნებს ბლოკში გაწევრიანებამდე გარკვეული ეკონომიკური შეღავათები მიანიჭოს. ინფორმაციას POLITICO ევროკავშირის ოფიციალურ პირებზე დაყრდნობით ავრცელებს.
გამოცემის ცნობით, ინიციატივა ე.წ. „ეტაპობრივი ინტეგრაციის“ პოლიტიკის ნაწილია და მიზნად ისახავს კანდიდატი ქვეყნების ევროკავშირთან დაახლოებას იმ პერიოდში, როდესაც მათი წევრობის განაცხადები ჯერ კიდევ განხილვის პროცესშია.
განხილული წინადადებები მოიცავს ევროკავშირის დაფინანსების პროგრამებზე წვდომას, სავაჭრო შეღავათებსა და ერთიან ბაზარზე ნაწილობრივ ინტეგრაციას. კონკრეტული პირობები კი თითოეული ქვეყნის მიერ განხორციელებულ რეფორმებსა და ევროკავშირის სტანდარტებთან დაახლოების ხარისხზე იქნება დამოკიდებული.
POLITICO-ს ინფორმაციით, ევროკომისია წევრი სახელმწიფოების მხარდაჭერის მოპოვებას უკვე უახლოეს თვეებში შეეცდება, ხოლო საკითხის განხილვა შესაძლოა ევროკავშირის ლიდერების ოქტომბრის ან დეკემბრის სამიტებზე დაიწყოს.
წყარო: POLITICO.
