ვენესუელაში ერთ წუთზე ნაკლებ დროში ორი ძლიერი მიწისძვრა დაფიქსირდა. BBC-ის ინფორმაციით, პირველი ბიძგის სიმძლავრე 7.2 მაგნიტუდა იყო, ხოლო 39 წამის შემდეგ რეგიონში 7.5 მაგნიტუდის კიდევ უფრო ძლიერი მიწისძვრა მოხდა.
აშშ-ის გეოლოგიური სამსახურის ცნობით, პირველი მიწისძვრის ეპიცენტრი იარაკუის შტატში, ქალაქ სან-ფელიპესთან მდებარეობდა.
ამ დროისთვის მსხვერპლისა და მატერიალური ზარალის ზუსტი მასშტაბი უცნობია, თუმცა სპეციალისტები არ გამორიცხავენ მძიმე შედეგებს. აშშ-ის გეოლოგიური სამსახურის შეფასებით, მიწისძვრებს შესაძლოა მნიშვნელოვანი მსხვერპლი და ფართომასშტაბიანი ნგრევა მოჰყოლოდა.
მედიის ცნობით, ძლიერი რყევები იგრძნობოდა დედაქალაქ კარაკასშიც, სადაც შენობების ჩამონგრევის შესახებ ვრცელდება ინფორმაცია. ადგილობრივი წყაროების თანახმად, ნანგრევებში მოყოლილი ადამიანები მაშველების დახმარებას ელოდებიან.
მომხდარის შემდეგ ვენესუელის შინაგან საქმეთა მინისტრმა მოსახლეობას სახლების დატოვებისა და უსაფრთხო ადგილებში გადასვლისკენ მოუწოდა, ხოლო პრეზიდენტის მოვალეობის შემსრულებელმა დელსი როდრიგესმა ქვეყანაში საგანგებო მდგომარეობა გამოაცხადა.
