ევროპის საბჭოს საპარლამენტო ასამბლეამ (PACE) საქართველოსთან დაკავშირებით რეზოლუცია მიიღო, რომელსაც 83-მა დეპუტატმა დაუჭირა მხარი, 5 წინააღმდეგ წავიდა, ხოლო 4-მა თავი შეიკავა.
დოკუმენტში აღნიშნულია, რომ საქართველოში დემოკრატიული უკუსვლა გრძელდება და ხელისუფლების მხრიდან ზეწოლა ხორციელდება სამოქალაქო საზოგადოების, პოლიტიკური ოპოზიციისა და განსხვავებული აზრის წარმომადგენლების მიმართ. ასამბლეის შეფასებით, მანამდე გაცემული რეკომენდაციების შესრულების მიმართულებით პროგრესი არ ფიქსირდება.
რეზოლუციაში ხაზგასმულია, რომ საქართველოში ოპოზიციური პარტიების შესაძლო აკრძალვა და მათი ლიდერების მიმართ სისხლისსამართლებრივი დევნა მიუღებელია და ეწინააღმდეგება დემოკრატიის ფუნდამენტურ პრინციპებს. PACE საქართველოს ხელისუფლებას მოუწოდებს, უარი თქვას ოპოზიციური ძალების აკრძალვის მცდელობებზე და შეწყვიტოს პოლიტიკურად მოტივირებული დევნა.
ასამბლეა ასევე აცხადებს, რომ ქვეყანაში არსებული პოლიტიკური პოლარიზაციის, სამოქალაქო საზოგადოების შეზღუდვისა და დამოუკიდებელ მედიაზე ზეწოლის ფონზე, ამჟამად არ არსებობს სრულად თავისუფალი და დემოკრატიული არჩევნების ჩატარებისთვის აუცილებელი გარემო.
რეზოლუციაში განსაკუთრებული ყურადღება ეთმობა გამოხატვისა და შეკრების თავისუფლების საკითხს. ასამბლეა მოუწოდებს ხელისუფლებას, გააუქმოს ბოლო პერიოდში მიღებული სადავო საკანონმდებლო ცვლილებები და უზრუნველყოს კანონმდებლობის შესაბამისობა ევროპულ სტანდარტებთან.
დოკუმენტში ასევე საუბარია დემონსტრაციების დროს პოლიციის მხრიდან ძალის შესაძლო გადამეტებაზე, საპროტესტო აქციების დაშლისას აკრძალული ქიმიური ნივთიერებების გამოყენების შესახებ გავრცელებულ ცნობებზე და ამ ფაქტებთან დაკავშირებით დამოუკიდებელი გამოძიების აუცილებლობაზე.
PACE კიდევ ერთხელ ადასტურებს, რომ მზად არის საქართველოს ხელისუფლებასთან, ოპოზიციასთან და სამოქალაქო სექტორთან დიალოგისთვის, თუმცა მიიჩნევს, რომ ქვეყნის დემოკრატიული განვითარების მიმართულებით გადადგმული ნაბიჯები ამ ეტაპზე არასაკმარისია.
