აშშ-ის პრეზიდენტის, დონალდ ტრამპის განცხადებით, ირანის ხელისუფლებამ ვაშინგტონს აცნობა, რომ ჰორმუზის სრუტეში მოძრავი გემებისთვის არანაირ გადასახადს, სადაზღვევო მოსაკრებელს ან სხვა სახის საფასურს არ აწესებს.
ტრამპმა აღნიშნულის შესახებ სოციალურ ქსელ Truth Social-ში დაწერა და აღნიშნა, რომ ამ საკითხზე გავრცელებული ცნობები „ყალბი მედიის“ მიერ ვრცელდება.
„თუ ეს ინფორმაცია მცდარი აღმოჩნდება, მოლაპარაკებები დაუყოვნებლივ დასრულდება“, – აცხადებს ტრამპი.
ამასთან, აშშ-ის პრეზიდენტმა უარყო ინფორმაცია, თითქოს ვაშინგტონმა თეირანს ფინანსური რესურსები გადასცა ან ირანის კუთვნილ აქტივებზე კონტროლი მოხსნა.
ტრამპის თქმით, აშშ ირანის გარკვეული ფინანსური რესურსების ნაწილის გამოყენებას მხოლოდ იმ პირობით განიხილავს, რომ აღნიშნული თანხები ამერიკელი ფერმერებისა და მეცხოველეებისგან სასოფლო-სამეურნეო პროდუქციის შესაძენად დაიხარჯოს.
„ჩვენ გავათავისუფლებთ მათი თანხების ნაწილს, რომელიც მთლიანად ჩვენი კონტროლის ქვეშაა, რათა გამოვიყენოთ ჩვენი ფერმერებისა და მეცხოველეებისგან სიმინდის, ხორბლის, სოიოსა და სხვა პროდუქტების შესაძენად. ირანში საკვები პროდუქტების მწვავე დეფიციტია და მათთვის საჭირო სურსათს მხოლოდ ამერიკის შეერთებული შტატებიდან შევიძენთ“, – წერს ტრამპი.
