საფრანგეთის ეროვნული ასამბლეა - მთავრობას ბიძინა ივანიშვილისა და მისი გარემოცვის წინააღმდეგ მიზნობრივი სანქციების დაწესებისკენ მოუწოდებს

საფრანგეთის ეროვნული ასამბლეის მიერ მიღებული რეზოლუცია საფრანგეთის მთავრობას ბიძინა ივანიშვილისა და მისი გარემოცვის წინააღმდეგ მიზნობრივი სანქციების დაწესებისკენ მოუწოდებს.

რეზოლუცია საფრანგეთის მთავრობას მოუწოდებს, რომ „თავის ევროპელ პარტნიორებთან კოორდინაციით, მხარი დაუჭიროს ევროპარლამენტის 2025 წლის 13 თებერვლის რეზოლუციაში აღნიშნული პირების, კერძოდ, ბიძინა ივანიშვილისა და მისი ახლო გარემოცვის წინააღმდეგ მიზნობრივი ინდივიდუალური სანქციების დაწესებას, ევროპარლამენტის მოწოდებისა და აშშ-ის მიერ უკვე დაწესებული სანქციების შემდეგ“.

რეზოლუცია „მოუწოდებს საფრანგეთის რესპუბლიკის მთავრობას, მოითხოვოს ყველა პოლიტპატიმრის დაუყოვნებლივ გათავისუფლება, მათ შორის ოპოზიციის ლიდერებისა და იმ ახალგაზრდა მშვიდობიანი დემონსტრანტების, რომლებიც დაკავებული არიან თავიანთი დემოკრატიული აქტივობის გამო“.

ასევე, საფრანგეთის ეროვნული ასამბლეა ქვეყნის მთავრობას მოუწოდებს, რომ ბიძინა ივანიშვილისთვის საპატიო ლეგიონის ორდენის მინიჭების პირობები შეისწავლოს.

რეზოლუცია „მოუწოდებს საფრანგეთის რესპუბლიკის მთავრობას, შეისწავლოს ბიძინა ივანიშვილისთვის საპატიო ლეგიონის ორდენის მინიჭების პირობები და განიხილოს ამ ჯილდოს ჩამორთმევის საკითხი, მისი იმ ქმედებების გათვალისწინებით, რომლებიც ეწინააღმდეგება რესპუბლიკის მიერ აღიარებულ ღირებულებებს“.

რეზოლუციის თანახმად, „ევროკავშირის ინსტიტუტებმა და წევრმა სახელმწიფოებმა მეტ ყურადღება უნდა გამოიჩინონ საქართველოში ფუნდამენტური უფლებების დაცვასთან დაკავშირებით და განიხილონ რეაგირების ზომები გამოვლენილ დარღვევებზე, მათ შორის, დარღვევების გაგრძელების შემთხვევაში, მიზნობრივი შემზღუდავი ინსტრუმენტების მობილიზების საშუალებით“.

საფრანგეთის ეროვნული ასამბლეა „იმედოვნებს, რომ ევროკავშირის საბჭოს ფარგლებში ყველა წევრ სახელმწიფოს შორის კოორდინაცია შესაძლებელს გახდის საერთო პოზიციის ჩამოყალიბებას, რომელიც დაეფუძნება დემოკრატიული ღირებულებების დაცვას, პოლიტპატიმრების დაუყოვნებლივ გათავისუფლებასა და სამხრეთ კავკასიაში ჩვენი საერთო ინტერესების დაცვას“.

ეროვნული ასამბლეა „მოუწოდებს ევროკავშირს, მკაცრად შეახსენოს საქართველოს ხელისუფლებას მისი ვალდებულება, რომ სრულად უზრუნველყოს საქართველოს ტერიტორიაზე მყოფი ევროკავშირის ყველა მოქალაქის ფუნდამენტური უფლებების დაცვა, მათ შორის, გამოხატვისა და პრესის თავისუფლება, პირადი უსაფრთხოება და გადაადგილების თავისუფლება, საქართველოს მიერ აღებული საერთაშორისო ვალდებულებების შესაბამისად“.

ასევე, საფრანგეთის ეროვნული ასამბლეა ევროკავშირს საქართველოს სამოქალაქო საზოგადოების მხარდაჭერის გაძლიერებისკენ მოუწოდებს.

რეზოლუცია „მოუწოდებს ევროკავშირს, მოახდინოს მხარდაჭერის მექანიზმების ადაპტაცია ქართული სამოქალაქო საზოგადოების სასარგებლოდ, რათა უზრუნველყოფილი იქნას მათი ეფექტურობა და მდგრადობა დეგრადირებულ ინსტიტუციურ კონტექსტში“.

რეზოლუცია „მოუწოდებს ევროკავშირსა და მის წევრ სახელმწიფოებს, მათ შორის საფრანგეთს, რომ საქართველოსთან თანამშრომლობის რეორიენტაცია მოახდინონ, რათა ამის ბენეფიციარი პირდაპირ სამოქალაქო საზოგადოება იყოს და უზრუნველყოფილ იქნას ის, რომ ევროპულმა დახმარებამ კონკრეტულად ხელი შეუწყოს ქვეყნის დემოკრატიული მდგრადობის გაძლიერებას“.

ასევე, საფრანგეთის ეროვნული ასამბლეა „მოუწოდებს ევროკავშირს, სანქციების მომდევნო პაკეტში დაამატოს ზომები, რომელთა მიზანიც რუსეთის წინააღმდეგ დაწესებული საერთაშორისო სანქციებისთვის საქართველოს მიერ გვერდის ავლის აღკვეთა იქნება“.

საფრანგეთის ეროვნული ასამბლეა „კიდევ ერთხელ ადასტურებს, რომ არ შეიძლება საქართველოს ევროპულ მომავალს საფრთხე ამჟამინდელი მთავრობის ქმედებებმა შეუქმნას და მოწოდებით გამოდის, რომ გაწევრიანების პერსპექტივა ღია დარჩეს იმ პირობით, რომ პოლიტიკური წინაპირობები შესრულდება და მოქმედი მთავრობის მიერ კანონის უზენაესობასა და ფუნდამენტურ უფლებებზე თავდასხმები დასრულდება“.