გამჭვირვალობის შესახებ კანონის მიღება იმიტომ იყო აუცილებელი, რომ ყველაფერი გამჭვირვალე იყოს. ასეთ შემთხვევაში, გვეცოდინება, ვინ საიდან ფინანსდება და ვის ინტერესებს ატარებს, – ამის შესახებ პარტია „ხალხის ძალის“ თავმჯდომარემ, სოზარ სუბარმა განაცხადა.
სოზარ სუბარს კითხვა დაუსვეს თინა ხიდაშელისა და პოლონელი ანალიტიკოსის, მარჩილ პჩიხოდნიაკის მოსაზრებების შესახებ, რომელიც მედიაში გამოქვეყნდა.
სოზარ სუბარის თქმით, თინა ხიდაშელი ტაივანის ინტერესებს ატარებს.
„„უცხოური გავლენის გამჭვირვალობის“ შესახებ კანონის მიღება სწორედ ამიტომ იყო აუცილებელი, რომ მსგავსი დაფინანსებების თაობაზე ყურმოკვრით კი არ ვიცოდეთ, არამედ ყველაფერი იყოს გამჭვირვალე და იუსტიციის სამინისტროს ვებგვერდზე ღიად ატვირთული, რომელსაც ყველა ერთად ვნახავთ. ასეთ შემთხვევაში, გვეცოდინება, ვინ საიდან ფინანსდება და ვის ინტერესებს ატარებს. ამ შემთხვევაში, თინა ხიდაშელი ტაივანის ინტერესებს ატარებს“, – განაცხადა სოზარ სუბარმა.
ამასთან, როგორც სუბარმა აღნიშნა, საქართველოსთვის ჩინეთთან ურთიერთობა მხოლოდ დადებითი შედეგის მომტანია.
„ევროკავშირსა და ჩინეთს ყოველდღე 2,5 მილიარდი ევროს მოცულობის ვაჭრობა აქვს, ჩინეთთან ჩვენმა წლიურმა ბრუნვამ რომ 2,5 მილიარდს მიაღწიოს, ეკონომიკურად ერთ-ერთი წარმატებული ქვეყანა ვიქნებით და ჩვენი ეკონომიკა გაიზრდება. საქართველოსთვის დიდი პოტენციალია, რომ ჩინეთთან ურთიერთობა გაიხსნას. ჩინეთთან სტრატეგიული პარტნიორობა აქვთ ამერიკას, ევროკავშირს, უკრაინას. ეს ჩვენთვისაც დიდი შესაძლებლობაა, მით უმეტეს, ჩვენ იმ გზაზე ვართ, სადაც ერთ-ერთი ყველაზე მოხერხებულია ვაჭრობა აღმოსავლეთსა და დასავლეთს შორის, განსაკუთრებით დღეს, როცა უკრაინის ომის გამო ჩრდილოეთის დერეფანს პრობლემები აქვს, ისრაელში ომის გამო სამხრეთის დერეფანს პრობლემები აქვს, წითელ ზღვაში გემების გატარება გაძნელებულია. ჩვენთვის ამ დერეფნის არსებობა კიდევ უფრო მნიშვნელოვანია. ოპოზიცია ამბობს, რომ ჩინეთთან მეგობრობა საქართველოსთვის არაფრის მომტანია. იმ დღიდან, როცა „ჰუსიტებმა“ წითელ ზღვაში გემების დაბომბვა დაიწყეს, 40 პროცენტით გაიზარდა რუსეთის რკინიგზაზე ჩინეთიდან ევროპაში მიმავალი ტვირთების გამავლობა. ჩვენ გვაკრიტიკებენ და 40 პროცენტით გაიზარდა ტვირთები, რომლებიც ევროპის სხვადასხვა ქვეყანაში მიდის. მგონი, ამ ფონზე გასაგებია, რომ საქართველოსთვის ჩინეთთან ურთიერთობა მხოლოდ დადებითი შედეგის მომტანია. ამას გარდა, ჩინეთი გაერო-ში უშიშროების საბჭოდ მუდმივი წევრია და მის სიტყვას წონა აქვს, მათ შორის ტერიტორიული მთლიანობის აღდგენისთვისაც“, – განაცხადა სოზარ სუბარმა.
