ევროპის ჩემპიონატის პლეი ოფის ნახევარფინალში საქართველო ლუქსემბურგს შეხვდება
21.03.2024 ნახვები: 629
დღეს, საქართველოს ნაკრები ევრო 2024-ის საკვალიფიკაციო ეტაპის ნახევარფინალურ შეხვედრას თბილისში, „დინამო არენაზე“ ლუქსემბურგის ეროვნულ გუნდთან ჩაატარებს. მატჩი 21:00 საათზე დაიწყება, პირდაპირ რეპორტაჟს საქართველოს პირველ არხი, საქართველოს რადიო (FM 102.3) და 1TVPLAY შემოგთავაზებთ.
მატჩისწინა ვარჯიში საგურამოში
საქართველოს ნაკრებმა მატჩისწინა ვარჯიში საგურამოს საწვრთნელ ბაზაზე ჩაატარა. ეროვნული გუნდი ტრიბუნიდან ქომაგებმა გაამხნევეს.
საქართველოს ნაკრების მთავარმა მწვრთნელმა, ვილი სანიოლმა სრული შემადგენლობა შეკრიბა. დისკვალიფიკაციის გამო გუნდს ლუქსემბურგთან ხვიჩა კვარაცხელია ვერ დაეხმარება. ნაკრებში ორწლიანი შესვენების შემდეგ დაბრუნდა ჯაბა კანკავა.
ლუქსემბურგის პრობლემები
სტუმრებს დიდი დანაკლისი აქვთ. ლუქსემბურგს დისკვალიფიკაციის გამო ვერ დაეხმარება დანელ სინანი („სტ.პაულის“ თავდამსხმელი), ხოლო ტრავმების გამო – ვინსენტ ტილი (აზერბაიჯანული „საბაჰის“ შემტევი), დირკ კარლსონი (ავსტრიული „სტ.პელტენის“ შემტევი) და ტიმოტე რიპილი (გერმანული „მაინცის“ ნახევარმცველი).
გუნდის მწვრთნელმა, ლუკ ჰოლცმა არ დააკონკრეტა, საქართველოსთან ითამაშებენ თუ ვერა ვენის „აუსტრიის“ცენტრალური მცველი მარვინ მარტინსი და „ჩერკასის“ ცენტრალური ნახევარმცველი ოლივიე ტილი, რომლებიც ჰოლცის გუნდის საკვანძო ფიგურები არიან. ორივე ტრავმირებული იყო, მაგრამ მომჯობინდნენ და შეკრებაზე იმყოფებიან.
მსაჯი ესპანეთიდან
უეფა-მ შეხვედრის მთავარ არბიტრად 40 წლის ხოსე მარია სანჩესი დანიშნა. ესპანელი არბიტრი ფიფა-ს მსაჯია და უეფა-ს მსაჯთა ელიტარულ კატეგორიაში შედის. საქმიანობა 2000 წელს დაიწყო. 2017 წელს სანჩესი ფიფა-ს სიაში მოხვდა. 2019 წლის 2 მაისს ის საფრანგეთში, ქალთა მსოფლიო ჩემპიონატს ვიდეორეფერის რანგში ემსახურებოდა. სანჩესი დაიბადა ლორკაში, მურსიაში. პროფესიით ეკონომისტია და ბანკში მუშაობდა. მას რაულ ბაერო და ინიგო პრიეტო დაეხმარებიან. მეოთხე არბიტრი ხესუს ხილ მანსანო იქნება, ხოლო ვიდეორეფერიზე პასუხისმგებლები ხუან მარტინეს მუნუერა და ალეხანდრო ერნანდესი არიან.
დიდი ეკრანი რესპუბლიკის მოედანზე
19:00 საათიდან თბილისში, რესპუბლიკის მოედანზე მერიის მიერ ორგანიზებული ფანზონა იფუნქციონირებს, სადაც მატჩს დიდ ეკრანზე აჩვენებენ. სფფ-ს პარტნიორი ორგანიზაციები სხვადასხვა გასართობ ღონისძიებას გამართავენ. ადგილზე იმუშავებს რამდენიმე კვების ობიექტი და ნაკრების ოფიციალური მაღაზია.
ილია თოფურიას გამოსვლა
სტადიონის კარი 19:00 საათზე გაიხსნება. 20:45 საათზე UFC-ის პირველი ქართველი ჩემპიონი, ილია თოფურია გულშემატკივარს საჩემპიონო ქამარს წარუდგენს.
საქართველოს ნაკრების შემადგენლობა
მეკარეები: გიორგი მამარდაშვილი (ვალენსია, ესპანეთი), გიორგი ლორია (დინამო თბილისი, საქართველო), ლუკა გუგეშაშვილი (ყარაბაღი, აზერბაიჯანი)
დაცვა: სოლომონ კვერკველია (ალ ახდუდი, საუდის არაბეთი), საბა საზონოვი (ტორინო, იტალია), გურამ კაშია (სლოვანი, სლოვაკეთი), გიორგი გველესიანი (პერსეპოლისი, ირანი), ლაშა დვალი (აპოელი, კვიპროსი), ლუკა ლოჩოშვილი (კრემონეზე, იტალია), ოთარ კაკაბაძე (კრაკოვია, პოლონეთი), ვლადიმერ მამუჩაშვილი (დინამო ბათუმი, საქართველო), ლევან შენგელია (პანეთოლიკოსი, საბერძნეთი), გიორგი წიტაიშვილი (დინამო ბათუმი, საქართველო), გიორგი გოჩოლეიშვილი (შახტარი, უკრაინა)
ნახევარდაცვა/თავდასხმა: ოთარ კიტეიშვილი (შტურმი, ავსტრია), ნიკა კვეკვესკირი (ლეხი, პოლონეთი), გიორგი ჩაკვეტაძე (უოტფორდი, ინგლისი), სანდრო ალთუნაშვილი (ვოლფსბერგერი, ავსტრია), გიორგი ქოჩორაშვილი (ლევანტე, ესპანეთი), ჯაბა კანკავა (სლოვანი, სლოვაკეთი), ანზორ მექვაბიშვილი (კრაიოვა, რუმინეთი), გიორგი მიქაუტაძე (მეცი, საფრანგეთი), ბუდუ ზივზივაძე (კარლსრუე, გერმანია), გიორგი ქვილითაია (აპოელი, კვიპროსი),ზურიკო დავითაშვილი (ბორდო, საფრანგეთი), ხვიჩა კვარაცხელია (ნაპოლი, იტალია)
მეორე ნახევარფინალში საბერძნეთი ყაზახეთს უმასპინძლებს. ლუექსემბურგთან წარმატების შემთხვევაში, „ჯვაროსნები“ ამ წყვილის გამარჯვებულს ევრო 2024-ის ფინალური ეტაპის საგზურისთვის თბილისში შეხვდებიან
