ალექსანდრ სირსკი - ომი უკრაინის საზღვართან დასრულდება

ომი უკრაინის საზღვართან დასრულდება, ამის შესახებ უკრაინის შეიარაღებული ძალების მთავარსარდლმა ალექსანდრ სირსკიმ გერმანულ ტელეარხ ZDF-თან ინტერვიუში განაცხადა.

"ომი 2014 წელს დაიწყო - ჩვენ ვსაუბრობთ ღია აგრესიაზე“, - თქვა სირსკიმ კითხვაზე, ფიქრობდა თუ არა ომის დასაწყისში, რომ ეს ასე დიდხანს გაგრძელდებოდა, - „როდესაც ეს აგრესია დაიწყო, ისეთი შეგრძნება მქონდა, რომ რაღაც უფსკრულში ჩავდიოდი, რომელსაც არავითარი მკაფიო ვადა არ აქვს. გასაგებია, რომ ეს ჩვენთვის დიდი პრობლემაა. მაშინ საერთოდ გაუგებარი იყო როდის დამთავრდებოდა ეს ყველაფერი . მაგრამ ჩემთვის ცხადი იყო, რომ ეს ხანგრძლივი და რთული იქნებოდა."

"ჩვენ უნდა დავასრულოთ ომი ჩვენს საზღვარზე.. ეს არის მთავარი, რადგან სხვა ვარიანტები არ განიხილება. იმიტომ, რომ ჩვენ უბრალოდ არ გვაქვს სხვა გამოსავალი. ეს ნიშნავს, რომ ყველამ, მთელმა საზოგადოებამ უნდა მოიყაროს თავი საერთო საქმის - გამარჯვების გარშემო", განაცხადა სირსკიმ.

მისი განცხადებით, ფრონტის ხაზზე შექმნილი ვითარება მძიმეა და უკრაინა, მტრის გამოფიტვის მიზნით, შეტევითი მოქმედებებიდან თავდაცვით ოპერაციაზე გადავიდა.

„შეტევითი მოქმედებებიდან თავდაცვითი ოპერაციის ჩატარებაზე გადავედით. ჩვენი ოპერაციის მიზანია მტრის გამოფიტვა, მაქსიმალური დანაკარგის მიყენება,“ - აღნიშნა სირსკიმ.

მისი თქმით, განსაკუთრებით ინტენსიური ბრძოლები მიმდინარეობს კუპიანსკის მიმართულებით, სადაც რუსული ძალები ცდილობენ, ნებისმიერ ფასად აიღონ კუპიანსკი და ყოველდღიურად აწყობენ პოზიციებს.

„ფაქტობრივად, მტერმა ეს შეტევა 2023 წლის 3 ოქტომბერს დაიწყო და უკვე 4 თვეა ახორციელებს მაღალი ინტენსივობის შეტევას. მათი დანაკარგები, განსაკუთრებით დაღუპულთა კუთხით, ბოლო მონაცემებით, ჩვენსას 7-8-ჯერ აღემატება“, - აღნიშნა სირსკიმ.

მისი თქმით, ომში ყოველდღიურად იზრდება დრონების როლი, ორივე მხრიდან მათი გამოყენების გახშირების გამო.

კითხვაზე, როდის დასრულდება ომი და არსებობს თუ არა მისი სწრაფად დასრულების პერსპექტივა, სირსკიმ უპასუხა: ”ეს ყველაფერი დამოკიდებულია მხარდაჭერის დონეზე და ჩვენი ქმედებების ეფექტურობაზე.”