დევიდ ქემერონი - „ჰუსიტების“ უგუნური ქმედებები უდანაშაულო ადამიანების სიცოცხლეს საფრთხეს უქმნის

დიდი ბრიტანეთის საგარეო საქმეთა მინისტრი დევიდ ქემერონი აცხადებს, რომ „ჰუსიტების“ თავდასხმები წითელ ზღვაში უნდა შეწყდეს. ამის შესახებ ქემერონმა სოციალურ ქსელში დაწერა.

„დიდმა ბრიტანეთმა და აშშ-მა „ჰუსიტების“ სამხედრო სამიზნეებზე მორიგი დარტყმები განახორციელეს. მათი უგუნური ქმედებები უდანაშაულო ადამიანების სიცოცხლეს საფრთხეს უქმნის, ემუქრება საზღვაო მიმოსვლის თავისუფლებას და რეგიონის დესტაბილიზაციას ახდენს. „ჰუსიტების“ თავდასხმები უნდა შეწყდეს“, – წერს დევიდ ქემერონი.

აშშ-მა და დიდმა ბრიტანეთმა „ჰუსიტების“ წინააღმდეგ დარტყმები განახორციელეს იემენში 13 ადგილას, 36 სამიზნეზე.

ეს არის აშშ-სა და დიდი ბრიტანეთის მიერ იემენში „ჰუსიტების“ წინააღმდეგ იერიშების მესამე სერია წითელ ზღვაში ხომალდებზე თავდასხმების საპასუხოდ. დარტყმები მხარდაჭერილი იყო ავსტრალიის, ბაჰრეინის, კანადის, დანიის, ნიდერლანდებისა და ახალი ზელანდიის მიერ.