„მიხეილ სააკაშვილი მადლობას უხდის სახალხო დამცველს მის საქმეში აქტიურად მონაწილეობისთვის," - განაცხადა დღეს, 10 დეკემბერს, მიხეილ სააკაშვილის ადვოკატმა, შოთა თუთბერიძემ გორის სამხედრო ჰოსპიტალის დატოვების შემდეგ.
ცნობისთვის: მესამე პრეზიდენტის სამშობლოში დაბრუნების საქმეზე ახალი ბრალდებული გია ლორთქიფანიძეა. ასევე, მიხეილ საააკაშვილი გუშინ, 9 დეკემბერს გამართულ სასამართლო პროცესს დასუსტებული ჯანმრთელობის მდგომარეობის გამო არ დასწრებია.
„რაც შეეხება დღევანდელი დღის ძალიან მნიშვნელოვან სიახლეს - გია ლორთქიფანიძის ბრალდებას, ამგვარი ადამიანის მიმართ სისხლის სამართლებრივი დევნის დაწყება მის მშობლიურ ქვეყანაში არის ერთადერთი, რუსეთის პოლიტიკური დაკვეთა და ამ დაკვეთის შესრულება საქართველოს ხელისუფლების მხრიდან.
მიხეილ სააკაშვილი საქართველოში ყოფნისას არ იცნობდა გია ლორთქიფანიძეს და სამწუხაროდ, არ იცნობდა იმიტომ, რომ მათ ძალიან ეფექტური და ნაყოფიერი თანამშრომლობა ჰქონდათ უკრაინაში, უკრაინისა და საქართველოს ინტერესების სასიკეთოდ.
რაც შეეხება გია ლორთქიფანიძისა და მიხეილ სააკაშვილის რაიმე ტიპის მოლაპარაკებას საზღვრის კვეთასთან დაკავშირებით, ამგვარი მოლაპარაკება მათ შორის, ჩემი ინფორმაციით, არ შემდგარა. მე მასალებს ჯერჯერობით არ ვიცნობ. ამასთან აღსანიშნავია, რომ რა თემაზეც უნდა ყოფილიყო მიხეილ სააკაშვილსა და გია ლორთქიფანიძეს შორის კომუნიკაცია, მიხეილ სააკაშვილს კანონი არ დაურღვევია სამშობლოში დაბრუნებისას, ის ფიზიკურად ვერ ჩაიდენდა სამართალდარღვევას", - განაცხადა შოთა თუთბერიძემ.
