ისეთ საკითხებზე, რომელიც ძალაუფლების შენარჩუნების ბერკეტებს ეხება, „ქართული ოცნება“ არავითარი რეფორმის გატარებას არ აპირებს - არ შეასრულებენ რეკომენდაციებს, რაც მათ ძალაუფლებას შეასუსტებს, - ასეთია ოპოზიციონერი დეპუტატის რომან გოცირიძის შეფასება.
პარლამენტში გამართული შეხვედრიდან გამოსულმა გოცირიძემ ჟურნალისტებს განუცხადა, რომ ხელისუფლება არსებითი ხასიათის ცვლილებების განხორციელებას არ გეგმავს. მან ამ კონტექსტში მართლმსაჯულების რეფორმა და საარჩევნო კანონმდებლობა დაასახელა.
გარდა ამისა, გოცირიძის ინფორმაციით, მმართველი გუნდი არც სამუშაო ჯგუფების შექმნას აპირებს, სადაც ევროკავშირის რეკომენდაციებთან დაკავშირებით კონკრეტული წინადადებების, მათ შორის ოპოზიციის ალტერნატიული შეთავაზებების განხილვა იქნებოდა შესაძლებელი.
როგორც გოცირიძემ აღნიშნა, ამ ყველაფრის მიუხედავად, ოპოზიციამ პროცესს საკუთარ მცდელობები არ უნდა დააკლოს.
„არის საკითხები, რომელთა ნაწილობრივი შესრულებაა შესაძლებელი და ასევე, არის ისეთი საკითხები, რომელზეც ევროკავშირის მხრიდან არის ნაკლები მოთხოვნა - ეს შეიძლება განხორციელდეს.
ევროკომისიის 12 რეკომენდაციიდანაც მხოლოდ სამი შესრულდა და მათ შესრულებასაც ზეწოლა სჭირდება. ამიტომ ოპოზიციამ ყველა შესაძლებლობა მაქსიმალურად უნდა გამოიყენოს. პროცესში გამოჩნდება რამდენად არის შესაძლებელი ამა თუ იმ რეკომენდაციის შესრულება - ყვავს რომ კაკალს გააგდებინებ, ესეც საქმეა, მაგრამ მთლიანობაში არსებითი ცვლილებების გატარებას არ აპირებენ“, - განაცხადა რომან გოცირიძემ.
ევროკავშირის ცხრა რეკომენდაციასთან დაკავშირებით პარლამენტში სამუშაო შეხვედრა გაიმართა.
