"ზურა მახარაძე იქნება ეს, თუ გიორგი ვაშაძე ანდა სააკაშვილი, რომელიც ინტენსიურად ლაპარაკობდა სისხლისღვრის აუცილებლობაზე, ყველა ეს მიმართულება არის საქართველოს ინტერესების საწინააღმდეგოდ," - ასე აფასებს "ქართული ოცნების" დეპუტატი გიორგი ვოლსკი პრორუსული ძალადობრივი დაჯგუფების მხრიდან სამოქალაქო დაპირისპირებისთვის მზადებას და იარაღის მობილიზებას.
გიორგი ვოლსკი "ალტ-ინფოს" მხრიდან შეიარაღების მობილიზების საკითხიდან აქცენტის გადატანას ცდილობს და პასუხისმგებლობას ოპოზიციას აკისრებს. ვოლსკის სამიზნე ამ შემთხვევაში "სტრატეგია აღმაშენებლის" ლიდერი გიორგი ვაშაძე და მის მიერ სასესიო სხდომაზე გაკეთებული განცხადება გახდა.
"ზურა მახარაძე იქნება ეს, თუ გიორგი ვაშაძე ანდა სააკაშვილი, რომელიც ინტენსიურად ლაპარაკობდა სისხლისღვრის აუცილებლობაზე, ყველა ეს მიმართულება არის საქართველოს ინტერესების საწინააღმდეგოდ. ეს არის ტრაგედია რომ ადამიანები ერთმანეთს იარაღის გამოყენებით ემუქრებიან. ვინც არ უნდა იყოს, მაგრამ როდესაც პარლამენტის ერთ-ერთი ოპოზიციური ფლანგის ხელმძღვანელი და ამავე დროს ხელმძღვანელი ენმ-ის ახლადშექმნილი კონგლომერატების, გამოდის და იმუქრება, რომ იარაღის გამოყენება მათ იციან და ეს უნდა მოხდეს, ეს რომ არ არის თქვენი თვალთახედვის არეალში, ეს მაკვირვებს,“ - ამბობს გიორგი ვოლსკი.
