იარაღის მობილიზება და სამოქალაქო დაპირისპირების ორგანიზება - ოპოზიცია საგამოძიებო უწყებებს "ალტ-ინფოს" ქმედებებით დაინტერესებისკენ მოუწოდებს.
როგორც ოპოზიციური პარტიების ლიდერები ამბობენ, ძალადობრივი დაჯგუფების განცხადებები და მოწოდებები სოციალურ ქსელში, სადაც შეიარაღების მობილიზება და მათგან განსხვავებული პოზიციების მქონე ჯგუფებთან დაპირისპირება იგეგმება, სისხლის სამართლის დანაშაულის ნიშნებს შეიცავს.
"ლელოს" დეპუტატი ანა ნაცვლიშვილი დარწმუნებულია, რომ ძალადობრივ, პრორუსულ დაჯგუფებას დაპირისპირების სცენარი ჩაუვარდება.
არ ვფიქრობ, რომ მათი ეს სცენარი გამოვა, ხელისგულზე დევს, ვინ ცდილობს საქართველოში დესტაბილიზაციას. ეს არის რუსეთი და მისი საცეცები, ფარცხალაძის, „ალტ-ინფოს“ და „ქართული ოცნების“ ხელით,“ - ამბობს ანა ნაცვლიშვილი.
სამართალდამცავები უკვე რომ გამოძიებას უნდა აწარმოებდნენ, ამაზე საუბრობს "ევროოპტიმისტების" წევრი ხატია დეკანოიძე. როგორც დეპუტატი ამბობს, იმ ფონზე, როდესაც შეიარაღებული თავდასხმის ორგანიზება სახეზეა და ამ დროს საგამოძიებო უწყებები არ მოქმედებენ, ადასტურებს იმას, რომ სახელმწიფო ინსტიტუტები პრორუსული დაჯგუფების გაძლიერებას ხელს უწყობენ.
"სამართალდამცავ უწყებას ზუსტად ცხვირწინ აქვს ინფორმაცია და ვიღაც ადამიანების მიერ თუნდაც სახელმწიფო გადატრიალების, შეიარაღებული თავდასხმის ორგანიზების მცდელობა და არაფერს აკეთებს, ეს ნიშნავს, რომ სუს-იც და მთელი სახელმწიფო სამსახური ეხმარება სწორედ "ალტ-ინფოს", იმისთვის, რომ გაძლიერდეს,“ - განაცხადა ხატია დეკანოიძემ.
"ნაციონალურ მოძრაობაში" კი თვლიან, რომ სწორედ სუს-ის განცხადებასთან თანხვედრაში მოდის ძალადობრივი ჯგუფების გააქტიურება.
„ალტ-ინფოს“ მორიგი გამოხტომა არის სინამდვილეში სუს-ის აბსურდული განცხადების გაგრძელება, ისინი ერთობლივად ცდილობენ, რომ რამენაირად ალარმიზაცია მოახდინონ თავისი "ოცნების" საბაზისო ამომრჩევლის,“ - ამბობს პეტრე ცისკარიშვილი.
tvpirveli.ge
