ამ დროის ინფორმაციით, ნაპოვნია ხუთი ცხედარი, რომლებიც გადასვენებულია პროზექტურაში. საერთო ჯამში, 16 ცხედარია მოძიებული სტიქიის ზონაში და მიმდინარეობს ცხედრების იდენტიფიცირება, – ამის შესახებ საგანგებო სიტუაციების მართვის სამსახურის უფროსმა, თემურ მღებრიშვილმა შოვში, სტიქიის ზონაში ყოფნისას განაცხადა.
როგორც თემურ მღებრიშვილმა აღნიშნა, სამაშველო ღონისძიებები დღეს დილიდან აქტიურად მიმდინარეობს.
„აქტიური სამუშაოების შედეგად მოეწყო მდინარეზე გადასასვლელი რკინის კონსტრუქციის ხიდი, რაც გვაძლევს საშუალებას, რომ გადავისროლოთ ყველა ის საჭირო ტექნიკა, რითიც მთელი ღამის განმავლობაში აქტიურად გავაგრძელებთ საძიებო სამუშაოებს“, – განაცხადა მღებრიშვილმა.
კითხვაზე, თითქოს ერთ-ერთი დაკარგული დაუკავშირდა მასწავლებელს და მას სთხოვა დახმარება, თემურ მღებრიშვილმა აღნიშნა, რომ გადამოწმდა ეს ინფორმაცია და სიმართლეს არ შეესაბამება.
„ჩვენი მხრიდან აბსოლუტურად ხდება ნებისმიერი სახის ინფორმაციის გადამოწმება. ამ კონკრეტულ შემთხვევაზე, თქვენ რაზეც საუბრობთ, თითქმის გადაჭრით შეგვიძლია ვთქვათ, რომ ეს, სამწუხაროდ, აღმოჩნდა არასწორი, არასრული ინფორმაცია. კიდევ ერთხელ მინდა, მოვუწოდო მოსახლეობას, ნებისმიერი სახის ასეთი ინფორმაციის, არ შემიძლია, ახლა სიტყვა „ტყუილი“ ვიხმარო, არასწორი ინფორმაცია, დავარქვათ ასე, თუკი ვინმე საჭიროდ ჩათვლის ინფორმაციის რაიმე სახით გადამოწმებას, მოგვმართოს როგორც ცხელ ხაზზე, ასევე 112-ში დააფიქსიროს ზარი და ჩვენი მხრიდან მაქსიმალურად მყისიერად მოხდება ყველანაირი სახის ინფორმაციის გადამოწმება, შემდეგ დადასტურება ან უარყოფა. ამ დროისთვის შვიდი ცხედარია იდენტიფიცირებული, თუმცა პროცესი გრძელდება და დღის ბოლომდე, ვფიქრობ, გარკვეული სიახლეები გვექნება ამ მიმართულებით. ჩვენ დღეს ორი მანქანა აღმოვაჩინეთ მდინარის კალაპოტში. ამ დროისთვის მიმდინარეობს აღნიშნული მანქანების ამოღება მდინარის კალაპოტიდან. შიგნით არ აღმოჩდნენ ადამიანები. ერთ-ერთი მანქანის მეპატრონეებიც დადგენილი გვყავს – ცოცხლები, ჯანმრთელები არიან. ასე რომ, ნებისმიერი სახის ინფორმაცია მოწმდება 100%-ის სიზუსტით“, – განაცხადა მღებრიშვილმა.
კითხვაზე, ვრცელდება ინფორმაცია, რომ კვლავ ხდება მდინარის ბუბას დაგუბება, თემურ მღებრიშვილმა აღნიშნა: „გვაქვს მსგავსი ინფორმაცია, სწორედ ამ წუთებში მიმდინარეობდა საგანგებო თათბირი, სადაც განხილული იქნა აღნიშნული საკითხი. რა თქმა უნდა, მიმდინარეობს დაკვირვება და აყვანილია კონტროლის ქვეშ აღნიშნული საკითხი, ამ დროისთვის საფრთხეს არ წარმოდგენს“.
