თეონა აქუბარდია - მოვუწოდებ პარლამენტის თითოეულ დეპუტატს, გავაკეთოთ ერთობლივი მიმართვა ნატო-ს წევრი ქვეყნებისადმი

მოვუწოდებ პარლამენტის თითოეულ დეპუტატს, რომ ახლა, როდესაც ვილნიუსში უნდა გაიმართოს ნატო-ს სამიტი, ერთობლივი მიმართვა გავაკეთოთ და მივმართოთ ნატო-ს წევრ ქვეყნებს, რათა კიდევ ერთხელ საქართველოს ნატო-ში წევრობის სურვილთან ერთად, დაფიქსირდეს თხოვნა საქართველოს მხარდაჭერის, რამდენადაც ეს არის საქართველოს უსაფრთხოებისთვის უმნიშვნელოვანესი ქოლგა, – ამის შესახებ პლენარულ სხდომაზე „რეფორმების ჯგუფის“ წევრმა, თეონა აქუბარდიამ განაცხადა.

მან მოუწოდა „ქართულ ოცნებას“, დააფიქსირონ საკუთარი პოზიცია აღნიშნულ საკითხთან დაკავშირებით.

„ვფიქრობ, რომ უნდა შევიმუშაოთ პოზიცია და თუ ეს იქნება ერთიანი, რა თქმა უნდა, მნიშვნელოვანია, რადგან ეს არის გაცხადებული ეროვნული ინტერესი და ეროვნული ინტერესებში რომ ერთობა გვმართებს, ეს მარტივი ჭეშმარიტებაა. ამავდროულად, მინდა, საგარეო საქმეთა მინისტრს მოვუწოდო, გააკეთოს განცხადება ნატო-ს სამიტის წინ, რა პოზიციები და რა შესაძლებლობები აქვს საქართველოს და საერთოდ, რას აკეთებს საგარეო უწყება საქართველოს ნატო-ში წინსვლისთვის“, – განაცხადა თეონა აქუბარდიამ.

ინფორმაციას საქართველოს პარლამენტის პრესსამსახური ავრცელებს.