სულ მცირე, უცნაურია, რომ მეუფე ნიკოლოზი, რომელიც ხშირად შედის მიხეილ სააკაშვილთან, ახლა აღმოჩნდა რუსეთის პატრიარქთან ანგელოზის დღის მისალოცად, – ამის შესახებ ჟურნალისტებს ფრაქცია „ქართული ოცნების“ თავმჯდომარემ, მამუკა მდინარაძემ განუცხადა.
მამუკა მდინარაძეს კითხვა დაუსვეს მიხეილ სააკაშვილის მოძღვრის, მეუფე ნიკოლოზის მოსკოვში ვიზიტსა და მის მიერ რუსეთის პატრიარქ კირილისთვის ანგელოზის დღის მილოცვასთან დაკავშირებით, რაზეც საქართველოს საპატრიარქომ განაცხადა, რომ მეუფე ნიკოლოზი მოსკოვში კერძო ვიზიტით იმყოფება და არ წარმოადგენს საქართველოს საპატრიარქოს.
მამუკა მდინარაძის თქმით, მეუფე ნიკოლოზის მოსკოვში საპატრიარქოს ეგიდის გარეშე ჩასვლა და რუსეთის პატრიარქისთვის ანგელოზის დღის მილოცვა უცნაურია.
„მე რამე განსაკუთრებულ კომენტარს ვერ გავაკეთებ. უცნაურია – მხოლოდ ამით შემოვიფარგლები. უცნაურია, რომ ეს ადამიანი აღმოჩნდა საპატრიარქოს თანხმობის გარეშე, თუ მისი ეგიდით რომ არ არის, წასული რუსეთი პატრიარქთან, თუმცა ეს ჩემი შესაფასებელი შეიძლება, არც იყოს. ასეთი უცნაურობები, როგორც მინიმუმ, ხშირად გვაქვს ხოლმე საინფორმაციო ველზე და შემდეგ, დრო რომ გადის, რაღაც ახსნები აქვს ხოლმე, თუმცა ნაჩქარევი კომენტარისგან თავს შევიკავებ. ხაზს გავუსვამ, რომ, მინიმუმ, უცნაურია, ის ადამიანი, რომელიც ძალაინ ხშირად შედის მიხეილ სააკაშვილთან, ახლა აღმოჩნდა რუსეთში და რუსეთის საპატრიარქოს ხელმძღვანელთან ანგელოზის დღის მისალოცად, რაც თქვენგან გავიგე. თუმცა, სხვა კომენტარს ვერ გავაკეთებ. ამას ალბათ გარკვეული ახსნა ექნება. უცნაურობა იმაში მდგომარეობს, რომ წარმოდგენა თუ არ აქვს საპატრიარქოს ამასთან დაკავშირებით, ეს არ არის მარტივი ამბავი“, – განაცხადა მამუკა მდინარაძემ.
