სოსო გოგაშვილს ხუთი წლით თავისუფლების აღკვეთა მიესაჯა

თბილისის საქალაქო სასამართლომ სახელმწიფო უსაფრთხოების სამსახურის უფროსის ყოფილ მოადგილეს, სოსო გოგაშვილს ხუთი წლით თავისუფლების აღკვეთა მიუსაჯა. გადაწყვეტილება მოსამართლე ვალერიან ბუგიანიშვილმა ცოტა ხნის წინ გამოცხადა.

პროკურორ ირაკლი მარშანიას განმარტებით, სოსო გოგაშვილი სასამართლომ ხუთივე ბრალდებაში ცნო დამნაშავედ. მისივე თქმით, ურთიერთშეჯერებული მტკიცებულებებიდან გამომდინარე, მოსალოდნელი იყო გამამტყუნებელი განაჩენი. „უამრავი მტკიცებულება იყო და ცალსახად დასტურდებოდა, რომ მან ჩაიდინა დანაშაულები“, – განაცხადა პროკურორმა.

ადვოკატი კი განაჩენს უსამართლოს უწოდებს და მის გასაჩივრებას გეგმავს.

„სასამართლომ 5 წელი გამოიტანა პირადი ცხოვრების საიდუმლოს უკანონოდ მოპოვებასა და შენახვაში. ეს ე.წ. პირადი საიდუმლო სხვისი პირადი ცხოვრების კადრებს ასახავს და გადაღებულია წინა ხელისუფლების პერიოდში. ასევე, რაც ყველაზე მთავარია, აღნიშნულ ინფორმაციასა და მასალაზე ხელი მიუწვდებოდა არა იოსებ გოგაშვილს, როგორც სახელმწიფო უსაფრთხოების სამსახურის უფროსის მოადგილეს, არამედ სახელმწიფო უსაფრთხოების სამსაუხრის ოპერატიულ-ტექნიკურ სააგენტოს. იოსებ გოგაშვილს აღნიშნული მასალები არც მოუპოვებია და არც შეუნახავს. რა ინფორმაციის მატარებელ მოწყობილობაზეც იყო ჩაწერილი აღნიშნული კადრები, მასზე არ ამოვიდა იოსებ გოგაშვილის დნმ-ი. შესაბამისად, ის არ ინახებოდა იოსებ გოგაშილის სახლში და შეტანილი იქნა სახელმწიფო უსაფრთხოების სამსახურის თანამშრომლების მიერ 2022 წლის 16 ივლისს. დაცვის მხარეს მტკიცებულებები წარდგენილი ჰქონდა სასამართლოში. კანონით დადგენილი წესით, ჩვენ ყველა სამართლებრივ რესურს ამოვწურავთ როგორც საქართველოში, ასევე საქართველოს ფარგლებს გარეთ“, – განაცხადა ადვოკატმა რამაზ ჩინჩალაძემ.

სახელმწიფო უსაფრთხოების სამსახურის თანამშრომლებმა სოსო გოგაშვილი 16 ივლისს დააკავეს.

მას ბრალდება წარედგენილი ჰქონდა საქართველოს სისხლის სამართლის კოდექსის 320-ე მუხლის პირველი ნაწილით (სახელმწიფო საიდუმლოების გახმაურება), საქართველოს სისხლის სამართლის კოდექსის 333-ე მუხლის პირველი ნაწილით (მოხელის მიერ სამსახურებრივი უფლებამოსილების გადამეტება, რამაც სახელმწიფოს კანონიერი ინტერესის არსებითი დარღვევა გამოიწვია), 157-ე მუხლის მე-4 ნაწილით (პერსონალური მონაცემების უკანონოდ მოპოვება, შენახვა, გავრცელება, რამაც მნიშვნელოვანი ზიანი გამოიწვია, სამსახურებრივი მდგომარეობის გამოყენებით) და 236 მუხლის მე-3 ნაწილით (ცეცხლსასროლი იარაღისა და საბრძოლო მასალის მართლსაწინააღმდეგო შეძენა და შენახვა).