„სტრატეგია აღმაშენებლის“ წევრის, პაატა მანჯგალაძის განცხადებით, „სტრატეგია აღმაშენებლის“ ფინანსები გამჭვირვალეა და დავით კეზერაშვილი მათ არ აფინანსებს.
ამასთან, მანჯგალაძის თქმით, ინტერვიუში კეზერაშვილმა თქვა, რომ ბევრს დაეხმარა და ეს დახმარება კანონში რომ არ ჯდებოდეს, „ქართულ ოცნებას“ უკვე საქმეები ექნებოდა აღძრული.
„დავით კეზერაშვილი ჩვენ ნამდვილად არ გვაფინანსებს, ჩვენი ფინანსები გამჭვირვალეა, დაფინანსებას სახელმწიფო ბიუჯეტიდან ვიღებთ და სახელმწიფო აუდიტის სამსახურში ფინანსურ დეკლარაციას წარმოვადგენთ. არანაირი „შავი ბუღალტერია“ არ გვაქვს. ეს რომ ასე იყოს, ხელისუფლებას ვერავინ მოასწრებდა ჩვენ წინააღმდეგ შავი პიარის აგორებას. არ ვიცი, კეზერაშვილი ვის აფინანსებს, მაგრამ ინტერვიუში თქვა, რომ ბევრს დაეხმარა. თქვა, რომ პროდასავლურ ფლანგს ძალიან უჭირს და ფინანსური დახმარება მნიშვნელოვანია ამ ფლანგის გაძლიერებისთვის. მართალი გითხრათ, დავით კეზერაშვილის გავლენა არ მიგრძვნია, რაიმე არ ვთქვა ან ვთქვა. შესაბამისად, თავისუფალი ვარ. შეიძლება, ვიღაცას აფინანსებს და მისი გავლენის ქვეშ არის. უნდა ვიცოდეთ, რა ფორმით დახმარებაზეა საუბარი, რადგან ფინანსური არ უხსენებია. ჰიპოტეტურად იმის თქმა, რომ ეს ადამიანი ოლიგარქია, რადგან ვიღაცას დაეხმარა, სწორი არ არის. ეს ადამიანი დახმარების ფორმების დამალვას არ აპირებს. ეს დახმარება კანონში რომ არ ჯდებოდეს, „ქართულ ოცნებას“ უკვე საქმეები ექნებოდა აღძრული“, – განაცხადა პაატა მანჯგალაძემ.
