რატი ბრეგაძე - ამაზე დიდი პარადოქსი და საზოგადოების დაცინვა რა უნდა იყოს, როდესაც „ნაციონალური მოძრაობა“ მოითხოვს ვინმეს მიმართ წამების შეჩერებას

ჩვენ არაფერი გვაქვს დასამალი და პირიქით, გვინდა, საზოგადოებამ იცოდეს სიმართლე. მთელი ამ პერიოდის განმავლობაში მოედინება ცილისწამების ძალიან დიდი ნიაღვარი არა მხოლოდ იუსტიციის სამინისტროს, არამედ მთელი სახელმწიფოს წინააღმდეგ, – ამის შესახებ საქართველოს იუსტიციის მინისტრმა, რატი ბრეგაძემ ტელეკომპანია „იმედის“ ეთერში განაცხადა.

როგორც რატი ბრეგაძემ აღნიშნა, დღესაც იუსტიციის სამინისტროსთან შეკრებილი იყო რამდენიმე აქტივისტი რადიკალური ოპოზიციიდან, კერძოდ, „ნაცმოძრაობიდან“, რომლებიც მოითხოვდნენ წამების შეჩერებას მიხეილ სააკაშვილის მიმართ.

„ამაზე დიდი პარადოქსი და საზოგადოების დაცინვა, პირდაპირ ვიტყვი ასეთი ფორმით, რა უნდა იყოს, როდესაც „ნაციონალური მოძრაობა“ მოითხოვს ვინმეს მიმართ წამების შეჩერებას, კერძოდ, პატიმრისას“, – აღნიშნა მინისტრმა.

ამასთან, მინისტრმა „ოჩიგავა საქართველოს წინააღმდეგ“ სტრასბურგის სასამართლოს გადაწყვეტილებაზეც ისაუბრა.

„დღევანდელ ქართულ სახელმწიფოს დაეკისრა კომპენსაციის გადახდა ადამიანის მიმართ იმის გამო, რომ ის სააკაშვილის პრეზიდენტობის პერიოდში ციხეში აწამეს, და რა ლექსიკა იყო  სტრასბურგის სასამართლოს გადაწყვეტილებაში გამოყენებული და როგორ იყო აღწერილი ეს წამება, ამის შესახებ ჩვენ საზოგადოებას  ერთხელ უკვე ვუთხარით. ამ გადაწყვეტილებაში აღწერილია წამების ის მეთოდები, რომლებიც ფართოდ იყო დანერგილი სწორედ „ნაციონალური მოძრაობის“ მმართველობის დროს პენიტენციურ დაწესებულებებში. რა მეთოდებზეა საუბარი, როგორ არაადამიანურ მიდგომებზე: ადამიანებს თავზე ახურავდნენ სპეციალურ ჩაფხუტს  და პირში უთავსებდნენ სპეციალურ  ბურთებს, რათა მათ არ ელაპარაკათ; ასევე, კარცერში ათავსებდნენ ცემენტის იატაკზე რამდენიმე ადამიანს, ლოგინი აკეცილი იყო 14 საათის განმავლობაში და დამკვიდრებული იყო ე.წ. საკარანტინე პროცედურები და წარმოიდგინეთ, რაზეა საუბარი – ეს იყო ხელკეტებით ცემა ნებისმიერი შემსვლელი პატიმრის, რათა უზრუნველეყოთ პატიმრების მორჩილება და მათი თანამშრომლობა. აქვე ძალიან ნიშანდობლივი მომენტია ამ გადაწყვეტილებაში აღნიშნული, რომ სწორედ 2012 წელს, მთავრობის ცვლილების შემდგომ, გაბედეს პატიმრებმა ამ პრაქტიკაზე საუბარი და სწორედ მაშინ გაბედეს, რომ შეეტანათ სარჩელები. დღეს ეს ძალა ჩვენ უსინდისოდ მოგვიწოდებს ვინმეს წამების შეწყვეტისაკენ, და რა არის წამება, მაშინ კონკრეტულად დაასაბუთონ – ის, რომ ადამიანს 1 800-ზე მეტი ვიზიტორი ჰყავდა?! ის, რომ არც ერთი უფლება მისი, როგორც პატიმრის, არ დარღვეულა პენიტენციურ დაწესებულებაში?! და ის, რომ თითქმის რვა  თვეა, იგი იმყოფება სამკურნალო დაწესებულებაში?!. – ეს არის რომელიმე  უფლების დარღვევა და ეს არის წამება?! ამის თქმა, ვინც უნდა იყოს მისი მხრიდან, არის ყოვლად დაუშვებელი“, – განაცხადა რატი ბრეგაძემ.