საქართველოს ყოფილი პრეზიდენტის მიხეილ სააკაშვილის ადვოკატებმა სააკაშვილისთვის სასჯელის გადავადების ან გათავისუფლების საკითხზე თბილისის საქალაქო სასამართლოს გადაწყვეტილება სააპელაციო სასამართლოში გაასაჩივრეს.
ადვოკატ შალვა ხაჭაპურიძის თქმით, არ აქვს მოლოდინი, რომ მეორე ინსტანციის სასამართლო სხვა გადაწყვეტილებას მიიღებს.
„პირველი ინსტანციის სასამართლოს გადაწყვეტილება დღეს გავასაჩივრეთ თბილისის სააპელაციო სასამართლოში. პროცედურულად, ხვალ ან ზეგ გადააგზავნიან, კვირის ბოლოს ან ორშაბათს გვეცოდინება, რომელ შემადგენლობას დაეწერება ეს საქმე. არანაირი მოლოდინი არ გვაქვს, რადგან მეგონა, მოსამართლე იღებდა საქართველოში გადაწყვეტილებას, მაგრამ რუსეთის საგარეო საქმეთა მინისტრის პრესმდივნის, მარია ზახაროვას გუშინდელი განცხადების შემდეგ გაირკვა, რომ მარია ზახაროვა იღებს ამ საქმეებზე გადაწყვეტილებას, კრემლის კაბინეტებში მიიღება გადაწყვეტილება. ეს განცხადება იყო პირდაპირი მტკიცებულება, რომ საქართველოს არც ხელისუფლება ჰყავს და არც სასამართლო. უნდა გავიაროთ გარკვეული ინსტანციები და ამის შემდეგ მივიღებთ გადაწყვეტილებას, გავასაჩივრებთ თუ არა სტრასბურგის სასამართლოში. თავად ბრალდებული და მისი ოჯახის წევრები მიიღებენ ამ გადაწყვეტილებას“, – აღნიშნა შალვა ხაჭაპურიძემ.
