აშშ-ის სახელმწიფო მდივანი ენტონი ბლინკენი ისრაელსა და პალესტინას მოუწოდებს, დაასრულონ ბოლოდროინდელი ძალადობა და მიემხრონ ვაშინგტონის მიერ მხარდაჭერილ ინიციატივას – ორი სახელმწიფოს იდეას, სადაც ისრაელის გვერდით დამოუკიდებელ სახელმწიფოდ იარსებებს პალესტინა.
ენტონი ბლინკენი ახლო აღმოსავლეთის ტურნეს ფარგლებში პალესტინაში იმყოფება. აშშ-ის სახელმწიფო მდივანი რამალაში პალესტინის ლიდერს, მაჰმუდ აბასს შეხვდა.
ბლინკენმა ასევე განაცხადა დამატებით 50 მილიონი დოლარის ოდენობით დაფინანსების გამოყოფის შესახებ, რომელსაც პალესტინა გაერო-ს ფონდების საშუალებით მიიღებს. მან ასევე აღნიშნა, რომ მიღწეულია შეთანხმება პალესტინელებისთვის მეოთხე თაობის მაღალსიჩქარიანი სატელეკომუნიკაციო სერვისების უზრუნველყოფასთან დაკავშირებით.
მაჰმუდ აბასთან შეხვედრამდე ბლინკენმა დეირ დიბვანი მოინახულა, რამალასთან მდებარე ქალაქი, სადაც არაერთი პალესტინელი ამერიკელი ცხოვრობს და იქ ადგილობრივი სამოქალაქო საზოგადოების წევრებსა და ბიზნესმენებს შეხვდა.
ეს ენტონი ბლინკენის პირველი ვიზიტია ახლო აღმოსავლეთში მას შემდეგ, რაც ისრაელის ხელისუფლების სათავეში ბენიამინ ნეთანიაჰუ დაბრუნდა. ერთი დღით ადრე ბლინკენი სწორედ თელავივს სტუმრობდა.
როგორც ბაიდენის ადმინისტრაციაში აცხადებენ, პალესტინაში საკონსულოს აღდგენას გეგმავენ, რომელიც ექსპრეზიდენტ დონალდ ტრამპის ადმინისტრაციამ დახურა, თუმცა ჯერ უცნობია, როდის მოხდება ეს.
