ევროპარლამენტი რეზოლუციაში სალომე ზურაბიშვილს მოუწოდებს, მიხეილ სააკაშვილთან დაკავშირებული პრობლემის გადასაწყვეტად მისი „კონსტიტუციური პრეროგატივები“ გამოიყენოს

ევროპარლამენტის მიერ მიღებულ რეზოლუციაში ჩანაწერი საქართველოს პრეზიდენტ სალომე ზურაბიშვილთან მიმართებაშიც ფიქსირდება.

კერძოდ, ევროპარლამენტი ერთ-ერთ შესწორებაში სალომე ზურაბიშვილს მოუწოდებს, მისი „კონსტიტუციური პრეროგატივები“ გამოიყენოს მიხეილ სააკაშვილთან დაკავშირებული პრობლემის გადასაწყვეტად.

აღნიშნული შესწორება ანა ფოტიგას მიერ იყო ინიცირებული და მას მხარი 525-მა ევროპარლამენტარმა დაუჭირა, 54 წინააღმდეგ წავიდა, ხოლო 31-მა თავი შეიკავა.

„[ევროპარლამენტი] კვლავ იმეორებს, რომ საქართველოს ხელისუფლება სრულ პასუხისმგებლობას ატარებს ყოფილი პრეზიდენტის ჯანმრთელობასა და კეთილდღეობაზე და პასუხისმგებლობის წინაშე უნდა დადგეს თუ მას რამე დაემართება; [ევროპარლამენტი] მოუწოდებს საქართველოს პრეზიდენტს გამოიყენოს მისი კონსტიტუციური პრეროგატივები ამ პრობლემის მოსაგვარებლად“, - წერია შესწორებაში.

ამავე შესწორებაში ევროპარლამენტი მოუწოდებს ევროკომისიის ვიცე-პრეზიდენტსა და ევროკავშირის უმაღლეს წარმომადგენელს საგარეო საქმეთა და უშიშროების პოლიტიკის საკითხებში, ჟოზეფ ბორელს, აქტიურად ჩაერთოს ყოფილი პრეზიდენტის გათავისუფლების უზრუნველყოფაში.