პრემიერის გამოსვლა იყო უბადრუკი თავის მართლება - ძველი სიმღერა რომ გაიჭედება ფირფიტაზე და ასჯერ იმეორებს “არ დაიდარდო, არ დაიდარდო“, ასე ასჯერ გამეორებული მოვისმინეთ - „პირსისხლიანი რეჟიმი, პირსისხლიანი რეჟიმი“, - ამის შესახებ ჟურნალისტებთან „ნაციონალური მოძრაობის“ დეპუტატმა რომან გოცირიძემ განაცხადა, რითაც პარლამენტში პრემიერ- მინისტრის ინტერპელაცია შეაფასა.
მისი თქმით, ხელისუფლება რეკომენდაციებს არ ასრულებს.
„პრემიერის გამოსვლა იყო უბადრუკი თავის მართლება იმით, რომ თურმე რეკომენდაციების შესრულებას ცდილობენ, არადა არც ერთი რეკომენდაცია არ შესრულდა, მხოლოდ სათაურები იქნება რეკომენდაციებისგან გადმოტანილი და შინაარსი იქნება აბსოლუტურად აცდენილი. უკვე ვნახეთ ორი კანონპროექტი მიიღეს და ოლიგარქის რეესტრს ადგენს ბატონი ღარიბაშვილი და ის ჩაწერს რეესტრში ივანიშვილს? ანტიკორუფციული ბიუროს ხელმძღვანელიც ისევ ღარიბაშვილია და როცა უნდა, მაშინ დანიშნავს და გააგდებს ბიუროს უფროსს. ვისაც ვერ აგდებდნენ, კანონით დაშალეს და აგერ, სახელმწიფო ინსპექტორის სამსახურზე აღნიშნა საკონსტიტუციო სასამართლომ, რომ ეს იყო უკანონო გადაწყვეტილება,“ - განაცხადა გოცირიძემ.
ის პრემიერის მიერ ოპოზიციის მიმართ გაკეთებულ განცხადებებსაც გამოეხმაურა და აღნიშნა, რომ ეს „ძველი სიმღერაა“, რომელიც ფირფიტაზე „იჭედება.
„ეს არის ძველი სიმღერა. აი, ჩემს ბავშვობაში პატეფონი არ იყო, მაგრამ ფირფიტები იყო. „არ დაიდარდო, არ დაიდარდოო“, რომ გაიჭედება და ასჯერ იმეორებს, აი, ასე ასჯერ გამეორებული მოვისმინეთ ერთი და იგივე - „პირსისხლიანი რეჟიმი, პირსისხლიანი რეჟიმი“. 20 წლის წინანდელ ამბავს რომ იხსენებ, 20 დღის წინ რა ჩაიდინე, ის მაინც უნდა გახსოვდეს“, - განაცხადა გოცირიძემ.
